LIS ERMAS DU 18 NOVEMBRE 2020 PAR FELIP REIG - COUVIDO 17

18 novembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 18 NOVEMBRE 2020: COUVIDO 17

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 18 NOVEMBRE 2020 par Felip Reig.

Cars ami, lou bon-jour en tóuti. Espère ‘mé forço impaciènci de poudé parla d’àutri causo que de la
babaroto. Pamens l’atualita abali nòsti pensado sènso que i’aguèsse besoun de se pausa la questioun à
respèt dóu sujèt de nosto crounico. Alor, ma fisto, ié sian mai ! Dintre tout ço que me fai chifra, i’a quicon
que vèn en-dessus, es la vióulènci que crèis à bèl èime e acò coumènço emé lou mounde que se rancuron
de-longo. Lis un volon agué sa messo, d’autre se volon recampa pèr jouga i pistachié. N’i’a que volon faire
d’esport, d’autre que volon vèire aquéli que n’en fan. Basto, degun es countènt de soun sort e pèr ço qu’es
de respeta li gèste essenciau, acò’s de figo d’un autre panié. Pènse que lou mounde sabon pus de qunt
flanc se vira. Avèn lis idèio enneblado. Fau dire qu’emé ço que sian à entèndre à la radiò vo dins lou
fenestroun, ço que poudèn vèire tambèn sus li maiun souciau vo legi dins lou journau, fau dire que tout
acò es mai d’avejaire que d’enfourmacioun vertadiero. Acò li journalisto l’an coumprés mai soun
despoutenta e ni pèr acò, tout d’uno tóuti aquéli que s’esprimon soun vengu d’espèrt. Ço de saupre, es
que lou mounde n’an soun gounfle pèr l’encauso de la manco de vido soucialo. Pamens, tóuti tant que
sian, sian-ti de plagne ? Poudrian pacienta quàuqui semano pèr poudé faire la mesuro di decisioun que
soun estado presso. Pamens tant qu’auren un laberinte dins l’esperit que n’en poudèn pas trouba lou bias
de se n’en sourti, saren pas capable de veni clar-vesènt. Pamens, un brigoun de clar-vesènço farié pas
de mau. Mai sian sèmpre dins un esmaradou dóu diable. Se l’afaire countinuo, sian tourna-mai lèst pèr
viéure un apoucalùssi jouiouso. Alor vèn urgènt de trouba la clau. Dison que l’an trouba la clau souto la
forme d’un vacin. Hóu ! l’ai pas enventa ! lou titre èro escri en gros sur la proumiero pajo dóu journau :
VACCIN ! Uno boumbo. Uno boumbo ecounoumico. Lis espèrt, encaro éli, espèron em’acò uno
remountado de l’ecounoumìo que va bouta fiò i bourso. Uno perspeitivo atrivarello, vo pulèu enmascarello.
D’efèt encò dou grand publi, fuguè la souspresso : noun pas boumbi de la joio, ausisse dins mis entour :
« bèn iéu siéu pas fisançous emé aquéu vacin » o « leissarai lis autre se faire vacina e veirai pèr iéu » o
encaro « d’ùni dison que se n’en poudèn pas fisa à-n-aquelo poutingo », d’autant que li scientifi demoron
prudènt. Soun avertimen es clar : « Avisas-vous bèn de pas leissa destourna vosto atencioun ! » Verai,
en fin finalo, se trobo qu’es pas la santa de li que malautejon qu’es au cèntre dis intérès, mai pulèu li
dardèno, l’argènt que tóuti se van poudé metre dins li pòchi. De pòchi grando coume de toumbèu de
faraoun estènt que s’agis de soumo faraounico que li laboratòri se van parteja. Mounte es la mouralo dins
tout acò ? De mounde assassino de mlierado de gènt e l’afaire ié raporto de bougnoun à bóudre ! Aro li
fau leissa s’ana cerca, li Chinés, li Rùssi e lis American. Pèr quant à la recerco franceso, se poudèn
demanda ço que i’a de francés aqui dedins estènt que li Fancés travaion emé l’Éuropo e la Souïsso e
qu’en Americo des francés beilejon de soucieta multinaciounalo. Vesès qu’aqui es tambèn la jounglo. E
la batèsto fai pas que de coumença estènt que l’Ourganisacioun Moundialo de la Santa, l’OMS, anóuncio
l’espelido d’uno deseno de vacin que soun dins sa tresenco faso d’assai. Pamens lou tresen de
nouvèmbre passa, l’OMS anouncié quaranto-sèt candidat-vacin emé de teinico diferènto pèr la maje part.
Quand lou mounde s’anaran faire vacina, sara de pas vèire tourna li mémis errour que pèr lou virus H1N1
de la pèsto aviàri. Pamens n’en sian panca à la vacinacioun. Dins la semano seguènto, lou poudé
eisecutiéu decidè doumaci lou decrèt dóu vint-e-sièis d’óutobre de douna l’autourisacioun is óuficino de
faire lou depistage de la couvido. Ai ! las, la maje part di farmacìo e dis abouticarié lou podon pas faire
dins li coundicioun sanitàri de requisto. En mai d’acò, forço farmacian dison que counèisson pas lou gèste
teini pèr lou faire. E entre cade paciènt fau desenfeta. Segur que i’a pas proun de mounde pèr acò faire.
Encaro un cop, lou gouvèr a mes l’araire davans li biòu e a moustra que pèr ço qu’es de n’en teni la co,
vole dire de l’araire, soun pas dis aigle. Aro, soun à vèire pèr remanda lis eleicioun regiounalo. N’en vaqui
uno idèio di bono. Pèr acò, i’a ges d’urgènci e sara toujour tèms de vèire aquelo questioun.
Lou vesès, lis idèio e li vejaire s’entre-tuerton dins lis esperit e es pas uno bono causo pèr-ço-qu’acò
coungreio uno manco de fisanço de la soucieta, ço qu’es tambèn uno pandemìo que soun mau es de
proudurre de prepaus que se contro-iston e qu’agravon encaro mai la manco de fisanço. Es un efèt
cumulatiéu que sa toco es d’esmarra lou mounde. Aro, sian plu de mounde avisa e libre de nòsti pensado.
E sabès tambèn que quand poudès faire crèire en quau que siegue qu’es en dangié de mort, alor vèn
poussible de n’en faire ço que voulès : pourta la masqueto, se faire vacina e l’aurre. De se saupre coume
acò, la coulèro crèis à bèl èime.

E lou sabèn tóuti, la coulèro arrapo coume de grame. E nautre à forço de tria de grame, dounan de grame
à tria. Avès pas coumprés ? Es tout-parié emé la couvido. Mai se n’en parlo, mai sian nega dins lou bestige
d’aquéli que n’en parlon. À forço de n’en manja gros, l’afaire va peta. Pamens n’en sian panca ‘qui.
Vaqui, aro vous doune rendès-vous la semano venènto. Tenès-vous fièr e gaiard. Basto que la pas
tournèsse dins li cor e lis esperit, e que lou tèms fuguèsse doucinèu. Brave mounde, adessias.