LIS ERMAS DU 11 NOVEMBRE 2020 PAR FELIP REIG - COUVIDO 16

11 novembre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 11 NOVEMBRE 2020: COUVIDO 16

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 11 NOVEMBRE 2020 par Felip Reig.

Cars ami, lou bon-jour en tóuti. Crese qu’aviéu pas ‘caba, la semano passado, de dire moun franc valentin
à respèt dóu biais que l’afaire de la couvido es esta beileja despièi la debuto. En mai d’acò, moussu Veran,
lou menistre de la santa a fa uno dicho aquesto semano e, ma fisto, es pas esta di mai moudèste dins
soun prepaus. Se lou falié crèire, es bono-di l’acioun dóu gouvèr que i’a pas mai de mort de la couvido.
N’en siéu resta sul pic pre coume un froumage de l’estoumagado, sabès, subran ai aganta un coudoun
qu’es pas de dire. Tron de pas disque, n’en siéu toumba sus lou quiéu. Urousamen que i’avié lou dequé
pèr fin que lou cop s’amourtiguèsse ! De que voulès ? D’èstre embarra de-longo, sian sèmpre à faire
d’ana-veni dóu fautuei au fregadou. Coumençan d’aganta un tafanàri à n’en faire s’apali de l’envejo uno
cavalo charouleso. Pèr assaja de douna di raro à la catastrofo, fasèn un pau de marcho, de tacounage à
l’oustau. Pamens sara mal-eisa de passa à coustat de la mau-parado. Basto, à cha pau, aquelo situacioun
fai veni lou tafagnoun. O, lou sabe bèn, sian pas de plagne. Verai. Mai quand même avèn l’impressioun
d’èstre pres en oustage. Avèn ges de vido soucialo. Avèn lou dre de travaia pèr aquéli que soun encaro
en ativeta, en revenge, ges de lesé pèr lis autre. Pamens fau agacha lou mounde dins lis espitau. Aquéli
li fau amira e lis encouraja estènt que n’an de besoun. E éli, es de bon que pèr ço qu’es de la vido
soucialo… passo muscado ! Dins lou quoutidian d’aquest matin, ai legi lou titre majourau « des soignants
exceptionnels ». An resoun, emai dins l’article fuguèsse escri que la mitan dintre éli soun à noun plus. Uno
resoun de mai pèr ié dire nòsti gramaci. Lou teletravai, éu, es à mand de moustra sa vertu e en fin finalo,
es uno bono causo. Moun nebout me disié : « lou matin, quand ma coumpagno coumenço de se
mousqueta la caro vo de se farda li gauto, me dise dintre iéu : aqueste matin i’a uno visiò-counferènci e
jamai m’engano ». A resoun. En mai d’acò, anas vèire li vèndo de camiseto e de vèsto van creba la chifro.
Li braio de pijama tambèn estènt que davans l’escran, lou bas a ges d’impourtanço. E iéu coume un ase
que vene de croumpa un coustume ! Vai fini sus lou bon coin. Seriousamen, i’a quicon que me fai chifra,
es de vèire tambèn que li decisioun dóu poudé centralisa coumençon de n’enmerda quàuquis-un, ato !
pièi que n’en siéu. Sarié belèu tèms de leissa li regioun decida de soun endevenidou. Verai, li decisioun
que soun estado preso dins la capitalo soun pas fourçadamen asatado pèr èstre aplicado encò nostre.
Sarié belèu tèms de decentralisa, noun ? La provo, an douna l’ordre de barra li librarié. Souto lou pretèste
de rèndre la justiço entre li gros e li pichot an enebi la vèndo de libre e de disque dins li cadeno coumercialo
coume la Fnac, en liò d’autourisa li pichot coumèrci de resta dubert. Es encaro uno decisioun preso à la
zuerto. Vese pas la risco que i’a d’ana se croumpa un libre, d’autant que la pratico d’aquéli coumèrci, d’un
biais generau, es proun seriouso. Part acò, es tout-parié pèr la maje part de pichot coumèrci. Avèn vist
tambèn li maire di vilo rebeca contro li darriéri decisioun dóu gouvèr. D’ùnis arrougantejèron emé vióulènci
bèn talamen que se meteguèron en foro de la lèi. La lèi ! Quento es la lèi dins de tempourado coume sian
à viéure vuei ? Desempièi uno bravo vóuto, li medecin tambèn an carga’no coulèro qu’es pas de dire. An
fa d’estùdi, adounc soun fourma pèr sougna li que malautejon e aro, ié dison coume fau faire e subre-tout
coume fau pas faire. Coumprenon pas éli tambèn e an la fumo, es à dire que soun enmalicia que-nounsai. Veiras qu’à la fin lou mounde de la poulitico se n’en sourtira emé lou quiéu propre. Troubaran bèn uno
escampo. Pèr acò faire, se ié poudèn fisa. Aro, i’a même de proufessour qu’an pourta rancuro estènt que
li mejan soun insufisènt dins soun establimen. Pamens, lis avès vist li jouino davans li restaurant dóu
gènre lèu-manja ? Soun lis un sus lis autre e sènso mai de precaucioun. Segur qu’entre lis un que soun
pas di mai coumpetènt e lis autre que soun imprudènt, se faudra pas lagna se l’afaire vèn duradis. Pamens
dins aquel emboui, se n’en trobo que tiron la castagno. Soun tóuti aquéli que fan de VPC coume se dis,
valènt-à-dire de vèndo pèr courrespoundènci. Encò miéu se vèi tout lou sanclame dóu jour uno farandoulo
de veituro e de camioun que fan de liéuresoun.
Aro, lou mounde dins moun entour coumençon de se demanda de qunt biais li fèsto calendalo se van
debana aquest an ? Es de prevèire que sara un brave varai, uno bourdouio de proumiero. Aqui, lou paire
Nouvè aura de grame à tria.
Vaqui, vous doune rendès-vous la semano venènto. Lou felip vous souvète uno semano bi bono e vous
fai la brassado… de-segur, de luen. Es de souveta que sara lèu poussible de faire castagno e vin dous.
E sort qu’encapito ! Basto que lou tèms fuguèsse doucinèu. Brave mounde, adessias