Lis Ermas du 14 octobre 2020 par Felip Reig - Fulconis 1

19 octobre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 14 OCTOBRE 2020: FULCONIS 1

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 14 OCTOBRE 2020 par Felip Reig.

Cars ami, brave mounde, la bono saludo en tóuti. Crese qu’en fin finalo vous vau parla de Louïs-Guihaume
Fulconis, l’artiste de trìo que ciselè la Coupo que li Catalan óufriguèron i Prouvençau lou 30 de juliet 1867
pèr li gramacia d’agué fa à Vitour Balaguer d’acuiènço calourènto. Segur, Fulconis es liga à l’istòri dóu
Félibrige, mai vole n’en parla subre-tout pèr-ço-qu’es un estatuaire d’engèni pas proun couneigu.
Segur tambèn que quand sian à evouca un persounage coume éu, avèn de demoura óujeitiéu e acò’s
mal-eisa, fàci à-n-un artiste coume éu. Pamens quand se saup l’erso d’amiracioun que soulevè e soulèvo
encaro, que legissèn tout ço que se dis à soun entour, que vesèn lou travail coumpli, sian segur d’èstre
en presènci d’un Èstre eicepciounau. Tout-d’uno, poudèn dire qu’es de Pèire-Louïs Fulconis, aquéu paire
emigra quand partiguè de Sant-Estève de Tinèio dins lis Aup-Maritime fin de se gandi à Marsiho en 1802,
que l’amour de la pèiro prenguè Louïs-Guihaume. Adounc, erian dins li jóuinis annado de Vitour Gelu
quand Pèire-Louïs Fulconis arribavo à Marsiho. Es de marca que tres siècle après l’ourdounanço de
Villers-Cotterêts, se parlo encaro lou prouvençau à Marsiho. Aqui lou paire de Louïs-Guihaume se faguè
boulengié e en 1808, rescountrè uno chato qu’èro pèr veni soun espouso, Margarido-Marìo. De soun
maridage, nasquèron Marìo au mes d’avoust 1809 e Jan au mes d’avoust 1811. Pamens la famiho deguè
garça soun camp marsihés pèr se gandi en Avignoun. Pèire-Louïs faguè mestié de Pesaire-publi e enant
d’aqui faguè lou countourolle di mèstre-boulengié. La famiho aculiguè Pèire-Louïs, lou tresen enfant au
mes de desèmbre 1813, un quatren au mes de jun 1816 e un cinquen que ié disien Louïs-Guihaume au
mes de febrié 1818. Soun paire, Louïs-Guihaume, éu, se faguè tourna-mai taiare de pèiro. Noun avié
óublida li gèst sacra. Es de saupre qu’après la neissènço de Louïs-Guihaume, la famiho s’istalè dins la
carriero Galanto, mounte restara un ome que ié disien Jan Brunet, un primadié dóu Felibrige. Ai ! las,
après quàuquis annado à nada dins l’aigo roso, la maire de Louïs-Guihaume defuntè e soun paire faguè,
éu tambèn, sa despartido pas gaire de tèms après. Erian en 1829. Louïs-Guihaume qu’avié panca trege
an, èro lou cago-nis de tres ourfanèu. Ni pèr acò, assegurè soun endevenidou.
Louïs-Guihaume seguiguè li cous de l’escolo di bèus-art d’Avignoun e se gagnè la vido emé sus óutils
avans que de se gandi à Marsiho mounte trevè l’escolo di bèus-art. Quand manjavo dins si dès-e-sèt an,
èro ja contro-mèstre. La memo annado, s’embarquè pèr ana en Argerìo pèr ié faire espeli sis espèr de
jouinesso, emé un fube d’oubrié qualifica que la premiero porto d’Óuriènt n’èro friando. Traversè la
Mediterragno en 54 ouro sus un batèu qu’avié noum Le Sully. Aqui, Pèire Guiauchain qu’èro l’architèite
de la vilo d’Argié ié baiè de travail e l’escultour-decouraire Francés Latour tambèn. Louïs-Guihaume se
boutè à travaia dins de mousqueto, coume li que ié disien la « Ketchawa », la « Djemâa el Kébir », la
« Dar Hassan Pacha » et la « Dar Aziza » que tóuti èron classificado « mounumen istouri ». Travaiè
tambèn dins de glèiso que li remena coulouniau impausavon, d’abord que d’edifice religious fuguèron
counverti pèr l’espressioun de la fe catoulico. Èro la counsequènci de la preso d’Argié en 1830. Basto,
Louïs-Guihaume faguè pas d’alòngui avans que de crea soun entre-presso e avié pas soun parié pèr
atraire la simpatìo di decidaire argerin. Acò encouragè Louïs-Guihaume pèr se rounsa dins l’estatuàri, sa
voucacioun vertadiero. Aqueste cop, Louïs-Guihaume se sarravo dis evesque d’Argié : Mounsegnour
Dupuch, Mounsegnour Pavy, pièi li Maçoun de la lojo Bélisaire coume lou venerable Jaque Descous, o
lou dignitàri Ounourat Curet que n’en faguè de retra e que tóuti èron sis ami. Li qualita umano e soucialo
de Louïs-Guihaume faguèron que i’óufriguèron l’iniciacioun pèr la franc-massounarié.
Dins l’entre-vau, Louïs-Guihaume rescountrè Elouïso Marché, uno dono desseparado de soun premier
espous, o pulèu qu’èro estado abandounado pèr éu e qu’avié ja dous enfant. Pamens, la lèi d’aquéu tèms
empachavo un segound maridage. Ni pèr acò, en 1851, Louïs-Guihaume aguè un fiéu, Vitour, d’aquelo
dono. Ai ! las, erian proche dóu retour en Franço, sènso que pousquessian n’en saupre lou perqué, leva
dóu déclin ecounoumi irreversible e pamens tempouràri de la situacioun ecounoumico en Agerìo. L’istòri
nous dis que dins lou meme tèms, proche la vilo de Rouen decidèron de basti la nouvello basilico goutico
nourmando de Bon-Secours. Vole dire avans que de vous saluda qu’aquelo crounico fuguè poussiblo
diéu-merci lou diciounàri qu’escriguè lou rèire-felen de Louïs-Guihaume que ié dison Andriéu-Pèire
Fulconis. Gramaci à-n-éu.
Vaqui, aro vous doune rendès-vous la semano venènto pèr la seguido d’aquelo istòri. Lou felip vous
souvète uno semano bi bono e vous lou tourne à dire : basto, que lou tèms fuguèsse doucinèu e la terro
lougiero. Brave mounde, adessias.