LIS ERMAS DU 17 FEVRIER 2021 PAR FELIP REIG - LOU MASSIS DE L’EGOUAL

17 février 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 17 Février 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 17 Février 2021 par Felip Reig.

_______________________________________________________________________

Cars ami, bèn lou bon-jour en tóuti. Lou darrié cop avian coumença de counta la bello istòri dóu rebouscage dóu Mount Egoual. Avian vist de qunt biais aquelo bello mountagno venguè uno mountagno pelado e subre-que-tout, li counsequènci murtriero e soun encidènci sus la naturo e la vido vidanto di gènt dóu relarg. Avèn parla tambèn de l’inercìo de l’Estat francés e dóu service dis Aigo e Fourèst. Pamens un ome venguè coume un sauvaire que ié disien Jòrgi Fabre. Nasquè lou sièis de jun 1844 en Ourleans, dins uno famiho saberudo, lou siéu paire que nasquè, éu, au pèd dóu Mount Lousero, èro proufessour de matematico, sa maire èro sabènto tambèn. Fabre èro pouliteinician. Intrè en 1886 à l’Escolo naciounalo fourestiero de Nancy e n’en sourtiguè majour de sa proumoucioun en 1868. Fuguè d’en premié Gardo generau dis Aigo e Fourèst à Dijoun e venguè pièi à Mendo de 1868 à 1875. Fuguè nouma souto-ispeitour, pièi ispeitour en Alès. Venguè enfin direitour dóu Service de rebouscage dóu despartamen de Gard jusqu’en 1900. Ié demourè enjusqu’en 1909, annado de sa retirado.
Aurié pouscu pretèndre à la gestioun di gràndi fourèst coume aquelo de Fontainebleau, pamens amè miéus veni en Lousero mounte degun ié voulié veni. Adounc, vaqui Jòrgi Fabre qu’arribè dins lou païs cevenau en 1869 emé la voulounta ferouge de rebousca la mountagno pelado. Venguè de soun sicap, pamens lou mounde ié faguèron marrido acuiènço e deguè teni targo à’no poupulacioun qu’agissien en foro de la lèi. Ni pèr acò, avié lou sèns dóu countat e aguè ges de mau pèr s’integra à la poupulacioun e au païs. Fabre aguè pièi lèu fa de faire la mesuro de l’amplour dóu travail de coumpli e saupeguè se douna li mejan amenistratiéu e financié pèr acò faire. Sabès ço que se dis : quand voulèn, poudèn ; quand poudèn, devèn ! Coumencè de croumpa de terro e se rounsè dins soun obro. Premié de tout ié falié counèisse lis essènci de bos que poudrien crèisse sus lou massis de l’Egoual. En mai d’acò, fauguè teni comte de la naturo dóu sòu, variablo segound lis endré, emé de chiste, de cauquié, de gneiss tambèn, e de grès. Pèr acò faire, prenguè sus si vacanço pèr sihouna lou mounde. Dins l’estiéu de 1870, i’aguè de souspresso, de marrìdi souspresso. La guerro prussiano derroumpeguè lou rebouscage. Aquelo guerro signè la fin dóu Segound Empire e en 1875, la Franço se dounè coume Regime óuficiau la Republico. Se troubè que la lèi de 1860 avié estado troubado forço impoupulàri. Fuguè remesso en questioun e lou païs de Franço oubrè pèr se douna uno lèi asatado à la réalité de la situacioun. Malurousamen, aquelo lèi èro mal-eisado d’interpreta e èro restritivo. Pamens Fabre fasié d’avans dins si recerco. Ai ! las, ni pèr un travail achini, li semenado à la la voulado dounèron ges, es à dire que faguèron chi e li plantacioun croumpado dins lou coumerce aguèron un pourcentage de reüssido de vint dóu cènt, pas mai. Coume l’afaire venguè aragnous, e qu’èro mal-eisa de trouba li grano de requisto, Fabre se virè dóu coustat de Carle Flahaut, un boutanisto qu’èro proufessour à l’universita di sciènci de Mountpelié despièi 1881. Degun saup la dato eisato dóu premié rescontre entre lis dous ome. Fau dire que lou doursié de Jòrgi Fabre despareiguè de l’amenistracioun. Pamens Fabre e Flahaut travaièron ensèn pèr rebousca l’Egoual. La climatoulougìo de l’Egoual es vertadieramen especialo. La temperaduro pòu varia à quicon proche de mens trento degra à plus trento degra. D’ivèr, pòu toumba mai de tres mètre de nèu. L’aurasso boufo mai de dous-cènt-sieisissanto jour de l’an. E tout acò chanjo vite emé l’autitudo. Jòrgi Fabre decidè de faire basti un óuservatòri meteouroulougi. La bastisoun coumencè en 1888, en travaiant que quàuqui mes cado annado. En fin finalo sèt an après, lou bastimen fuguè inagura lou 18 d’avoust 1894. Es basti à 1567 mètre d’autitudo. Flahaut que fuguè escais-nouma « Lou Jardinié de l’Egoual » e Fabre creèron d’auboureton au cor de l’Egoual emé la toco de poudé testa de noumbróusis espèci d’Éuropo, d’Americo dóu Nord e d’Asìo. En fin finalo lis dous ome reüssiguèron à faire planta 68 milioun d’aubre. L’Egoual avié tourna trouba sa cuberturo de verduro. Fabre fuguè elegi membre de l’Acadèmi de Nime en 1905 e prenguè sa retirado en 1909 quand malautejè. Mouriguè en 1911. Emile Reinaud ié rendeguè un bèl óumage em’ aquéli vers manleva de soun poèmo que soun titre es « L’Aigoual » :


Et désormais, si les montagnes se reboisent,

Si la terre verdit, si les fils s'entrecroisent,

Annonçant la pluie ou le froid, Si de ce belvédère on suit les vents sonores,

Si l'on voit se former, grandir les météores,

À Fabre l'honneur en échoit.


Emile Reinaud, Beautés des Causses et Cévennes : poésies régionales.


Vaqui, pèr aro es acaba. Pamens, vous doune rendès-vous la semano venènto. D’eici aqui, brave mounde, tenès-vous fièr e gaiard e basto que lou tèms fuguèsse doucinèu. Adessias en tóuti !


Felip