LIS ERMAS DU 21 OCTOBRE 2020 PAR FELIP REIG - FULCONIS 2

22 octobre 2020
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 21 OCTOBRE 2020: FULCONIS 1

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 21 OCTOBRE 2020 par Felip Reig.

Cars ami, brave mounde, bèn lou bon-jour en tóuti. La semano passado, avèn coumença de parla de
Louïs-Guihaume Fulconis, un estatuaire d’engèni e un ome remirable. S’erian aplanta quand LouïsGuihaume èro parti d’Argerìo pèr s’entourna en Franço emé sa famiho. L’einat que ié disien Vitour diguè
pièi que si gènt an toujour garda un dous souveni dis ome e di femo argerin. L’istòri nous dis tambèn que
dins lou meme tèms, proche la vilo de Rouen decidèron de basti la nouvello baselico goutico nourmando
de Bon-Secours. Adounc, la famiho plantè caviho en Nourmandìo e Louïs-Guihaume signavo l’estatuàri
de la baselico. Un cop de mai si qualita de taiare de pèiro e umano ié durbiguèron tóuti li porto e
coustituïguèron li foundamento de se reüssido soucialo e proufessionello. Uno coulabouracioun
emprencho d’amista que councernè tambèn lou paire Arthur Martin, pas lou di lavo-linge, mai l’especialisto
jesuïsto d’art religious. Uno amista que coumencè en 1852 e que s’acabè ‘mé la mort de l’artisto en 1873,
dounc 21 an après. Li liame nourmand fuguèron bèn talamen prefound, que Louïs-Guihaume escriguè àn-un ami prouvençau que la Nourmandìo èro sa segoundo patrìo. Après lou passage en Nourmandìo, Li
Fulconis s’entournèron à Paris. Élouïso Fulconis esperavo ié trouba uno vido soucialo pariero que la que
couneiguè en Argerìo ; Louïs-Guihaume que manjavo, éu, dins si trento-sèt an voulié aprouficha d’aquelo
óucasioun pèr eslarga lou ciéucle de sis ami. Aqui, fuguè lou paire Godefroy que permeteguè à l’estatuaire
d’espremi soun biais de faire. Acò ié faguè se durbi li porto dóu Louvre e la noutourieta de Louïs-Guihaume
s’espoumpiguè encaro mai. Quand aguè quaranto an, Fulconis avié uno renoumado impourtanto que
sourgentè de la fe e di qualita umano que cimentavon lou parèu. Es de dire qu’Elouïso baiavo forço ajudo
à soun espous, emai beilejèsse un ataié de courduro. Louïs-Guihaume fuguè pièi lou premié à representa
le pichot Prince imperiau e dins la memo annado presentè lou retra dóu dóutour Camihe Raspail
qu’apartenié à uno ilustro famiho republicano qu’èro óupausado au regime de l’Empire. Pamens fasié
l’unanimeta que que siegon li counvicioun dóu coumandatàri de l’obro. Aquel artisto anè jusqu’en Americo
dóu Nord pèr realisa lou retra d’Abraham Lincoln que lou 31 de janvié 1865 faguè vouta l’aboulicioun de
l’esclavage. Louïs-Guihaume multipliquè li cap d’obro qu’es daumage de pas poudé vous n’en moustra
quàuquis escapouloun sus de foutò. En 1859, fuguèron li jesuïsto de Toulouso que demandèron à Fulconis
de decoura sa nouvello glèiso, segui pèr si counfraire parisen pèr la glèiso sant Ignaço. Dins la memo
annado, escultavo lou mounumen reliquàri de Mounsegnour Sibour à Sant-Estève vo Sant-Etiève coume
se dis en arpitan. Pièi fuguè tourna-mai Paris pèr d’àutri cap d’obro. Pamens soun noumbrous aquéli que
soun pas esta enventouria. Lou desvouloupamen di camin de ferre baiè d’ajudo à Louïs-Guihaume, estènt
que la Nourmandìo se sarrè de Paris ounte avié soun ataié pèr faire en modo qu’un cop acabado sis obro
pousquèsson èstre traspourtado lèu en Nourmandìo. Pèr douna uno idèio à l’entour dóu desvouloupamen
dóu camin de ferre, es de saupre que li 3685 km à la debuto de 1852, venguèron 17440 à la fin dóu
segound Empire en 1870. Alor, coume n’i’avié pas proun, Louïs-Guihaume entamenè lou chantié de la
baselico de Notre-Dame de la Délivrande à Douvre-la-Délivrande dins lou despartamen de Calvados.
Aquéu pres-fa que coumencè en 1854, annado que fuguè founda lou Felibrige, durè jusqu’en 1878. En
1865, l’estatuaire de trìo travaiavo à Sant-Patriço de Rouen sus lou jasènt de Court-Mantèu, escais-noum
d’Enri lou Jouine, lou fiéu d’Enri lou dousen e d’Alienor d’Aquitàni que visquè au siècle XIIen
. En 1869,
Louïs-Guihaume realisè li jasènt de la capello de la Vierge de la glèiso de Sant-Ouen et d’autre en seguido.
Inalassable, Louïs-Guihaume realisè tambèn en 1872 li vuech estatuo dóu cor dins la glèiso de sant Matiéu
e l’estatuàri de la glèiso parouquialo de Nosto-Damo de l’Assoumcioun de Caudebec-les-Elbeuf emé
l’estatuo de Marìo-Madaleno e lou bas-relèu dóu grand-autar, sènso óublida Gruchet-Le-Valasse emé
l’estatuo de sant Fiacre e la de sant Jóusè. Li vilo de Caudebec-les-Elbeuf e Gruchet-Le-Valasse se trobon
dins lou despartamen de Seine-maritimo. Veiren lou cop venènt, dins la dariero partido counsacrado à
Louïs-Guihaume ço que faguè en 1873, la darriero annado de sa vido.
Gramacìe un cop de mai lou rèire-felen de Louïs-Guihaume que ié dison Andriéu-Pèire Fulconis pèr soun
ajudo diéu-merci lou diciounàri qu’escriguè.
Vaqui, adounc vous doune rendès-vous la semano venènto pèr la seguido e la fin d’aquelo istòri. Lou felip
vous souvète uno semano bi bono e vous lou tourne à dire : avanças d’un pas lèri. Brave mounde,
adessias.