LIS ERMAS DU 24 FEVRIER 2021 PAR FELIP REIG - LOU MASSIS DE L’EGOUAL (3)

24 février 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 24 Février 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 24 Février 2021 par Felip Reig.

_______________________________________________________________________

Cars ami, bèn lou bon-jour en tóuti. Lou darrié cop avian acaba de counta la bello istòri dóu rebouscage dóu Mount
Egoual. Poudèn n’en dire encaro quàuqui mot. Verai, voudriéu rèndre óumage à Marc Khanne que realisè aquéu
filme pèr se ramenta de l’aventuro de Jòrgi Fabre, l’ome que bono-di soun acioun l’Egoual recoubrè soun mantèu
de verduro. Sènso acò monte n’en sarian vuei ? Poudèn dire nosto amiracioun pèr Carle Flahaut tambèn, lou
boutanisto de Mount-Pelié qu’ajudè Fabre dins soun obro e que la perseguiguè. Sabèn que dins tóuti lis istòri i’a
uno part de mite. N’en fau èstre counsciènt. Pamens acó lèvo rèn au merite de Fabre. I’aguè pièi uno seguido à-naquelo istòri. D’efèt, rebousquèron la mountagno sènso se pausa la questioun dóu mitan ecoulougi. De-segur acò’ro
pas de modo d’aquelo pountannado. Pamens aguèron lèu fa de se rèndre comte que i’a de meno d’animau e d’insèite
que se poudien plus reproudurre. Plaça au cor dóu Pargue naciounau di Ceveno, lou massis après èstre esta uno
mountagno pelado èro pèr veni uno montagno sènso deserto d’ourganisme vivènt o quàsi. Adounc, lou Counsèu
despartamentau de Gard entre-prenguè d’adurre de soulucioun. E la premiero èro de… desbousca ùnis endré.
Ansin, venguè necite de tourna coupa de bos. Aqueste cop, tout fuguè carcula d’un biais menimous pèr restituï de
courredou ecoulougi. La toco d’aquéli courredou èro d’assegura la countinuëta genetico au service de la
bioudiversita. Ansin un pres-fa permeteguè à’n parpaioun que ié dison lou mié-apouloun de se pousqué reproudurre.
I’a peraqui’no dougeno de placeto pèr aquelo meno de parpaioun qu’èro à mand de desparèisse. Adounc, lis ome
se boutèron à coupa lis aubre qu’avien un diamètre inferiour à vint centimètre sus un courredou de quàsi milo mètre
de long e de trento mètre de larjour. Es tout-parié pèr la sesoun dis amour encò di cèrvi e d’àutris espèci animalo. Ié
fauguè de plaço. Vuei, lou jouièu di Ceveno es au cèntre dis atencioun e lou Counsèu despartamentau es un ourfèbre
de trìo. Aro se voulès, anan escouta un tros dóu filme de Marc Khanne que soun titre es L’Aigoual, la forêt retrouvée.
Lou rôle de Jòrgi Fabre es tengu pèr Laurent Chouteau mentre que Cristòu Fiévet jogo lou rôle de Carle Flahaut.
Ah ! segur lou filme es en francés.
Tros de filme…
Siéu à me dire dintre iéu que sarié tras-que bèu de lou vèire un jour revira en lengo d’o. N’en poudèn pantaia, noun ?
Vaqui, se voulès anan acaba em’un tros de pouësìo d’Andriéu Chamson, roumancié, istourian, resistènt, pièi
academician que repauso au cóu de la Luseto e que cade an li Felibre soun coutrìo de la famiho d’Andriéu Chamson
pèr ié rèndre un óumage. Andriéu Chamson escriguè quàuqui tèste en lengo e avié pèr si Ceveno uno amour sènso
raro.
Leituro dóu pouèmo : « An Nouvèu », d’Andriéu Chamson.
Vaqui, pèr aro es acaba. Pamens, vous doune rendès-vous la semano venènto pèr uno autro istòri. D’eici aqui,
tenès-vous fièr e gaiard e basto que lou tèms fuguèsse doucinèu. Brave mounde, adessias en tóuti !