LIS ERMAS DU 3 MARS 2021 PAR FELIP REIG - ANDREA GUIOT

03 mars 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 03 Mars 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 03 Mars 2021 par Felip Reig.

_______________________________________________________________________

Cars ami, bèn lou bon-jour en tóuti. Lou dimècre dès-e-sèt de fébrié, legiguerian dins lou journau qu’Andrea Guiot avié fa sa despartido. La vaqui, aro i camp d’Alis à encanta lou mounde. Quand Frederi Mistral publiquè Mirèio, èro luen de pensa qu’un jour soun pouèmo ié durbirié un camin de glòri, de glòri pèr Prouvènço, acò vai soulet e vous vau pas counta l’istòri que tóuti tant que sias la couneissès. Pamens, tre l’espelido de Mirèio, Carle Gounod prenié lengo emé Mistral emé la toco de counvincre lou Mèstre de Maiano de ié dire de o pèr faire de Mirèio un oupera. Belèu qu’aquelo iniciativo sourgentè dóu rescontre de Mistral emé Lamartine. Gounod èro pas nè e aguè lèu fa de coumprene que la recouneissènço de Lamartine èro un afaire di bon. D’en proumié, uno tramo fuguè mandado à Mistral pèr fin que l’aprouvèsse. Lou dès-e-sèt de febrié 1863, Gounod gramaciè Mistral qu’aceitè qu’un oupera siegue coumpausa sus la baso dóu siéu poèmo. Uno semano après, Mistral counvidè Gounod pèr fin que venguèsse sejourna quàuqui jour en Prouvènço. Gounod faguè pas d’alòngui e arribè lou douge de mars 1863 dins uno oustalarié de Sant-Roumié-de-Prouvènço. Gounod ié demourè jusqu’au mes de juliet. Lou dès-e-nòu de mars 1864, l’oupera fuguè crea au teatre liri de Paris. Pamens, lou sucès fuguè relatiéu. Se diguè qu’èro pèr l’encauso di cinq ate e de la mort de Mirèio. Ni pèr quàuqui moudificacioun ditado pèr lou direitour dóu teatre que ié disien Leoun Carvalho, l’espetacle aguè pas li favour dóu mounde. Mirèio couneiguè pièi forço revirado e fauguè espera 1939 pèr faire en modo que Mirèio retroubèsse sa formo óuriginalo. En 1853, uno cantairis que ié disien Marìo-Caroulino Miolan venguè dono Marìo-Caroulino Miolan-Carvalho, l’espouso dóu direitour dóu teatre. Naturalamen, es elo que jougavo lou rôle de Mirèio. Belèu que sias à vous demanda quent es lou raport em’ Andrea Guiot que n’en parlave tout-escas. Aro, sian tout-bèu-just au pica de la daio. Andrea Guiot naquè lou vounge de janvié 1928 à Garouns dins lou despartamen de Gard. Manjavo dins sa dougenco annado quand descurbiguè l’oupera. Èro à Nime, dins uno representacioun d’Eroudiade, un creacioun de Jule Massenet en 1881, ispirado d’Eroudias, un conte de Gustave Flaubert. Andrea Guiot veguè l’espetacle e n’en fuguè escarrabihado. Faguè d’estùdi à Nime emé lou tenor Marcello Santalouna. Partiguè pièi au Counservatòri de Paris e óutenguè en 1955 li premié prèmi de cant e d’oupera. Cantè Ourfiéu de Gluck, Poulenc emé le Dialogue des Carmélites à Nòu-Iork, Benvenuto Cellini de Berlioz, Falstaff de Verdi e Turandot de Puccini. Cantè tambèn à Chicago, au Vatican, à Buenos-Aires e cantè de pertout en Éuropo e couneiguè de sucès grandaras. Dins lis areno nimesenco, cantè ‘mé Maria Callas lou rôle de Micaëla de Carmen. Es de-bon que Bizet et Gounod fuguèron de toujour si compousitour de predileicioun. Adounc, à la debuto dis annado sieissanto, cantavo la Mirèio de Gounod. Èro un rôle de requisto pèr elo bèn talamen que fuguè escais-noumado La Mirèio Naciounalo.
Tros de musico


En 2012, lou dimenche de la voto de Mandiuel Andrea Guiot venguè sus lou bescaume de la coumuno. Èro estado counvidado pèr lou mèstre d’obro dóu Felibrige Michèu Fournier. Fuguè ounourado mai-que-mai e fuguè pèr nautre un rescontre inóublidable.
Dins lis annado setanto prenguè sa retirado dins soun vilage de Garouns, au mas di Rapatèu. Demourè estacado à Camargo e à soun païs pèr toujour e jamai.Lou quinge de febrié passa faguè sa despartido pèr l’encauso de la couvido. Avié nounanto-tres an.
Tros de musico


Vaqui, pèr aro es acaba. Pamens, vous doune rendès-vous la semano venènto pèr uno autro istòri. D’eici aqui, tenès-vous fièr e gaiard e basto que lou tèms fuguèsse doucinèu. Brave mounde, adessias en tóuti !