LIS ERMAS PAR FELIP REIG SUR RADIO NÎMES - ESPOUSICIOUN FREDERI MISTRAL 2

19 décembre 2024
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

-------------------------------------------------------------------------------------

ESPOUSICIOUN FREDERI MISTRAL 2

.............................................

Brave mounde, bèn lou bon-jour en tóuti… I’a un parèu de semaine d’acò, parlavian de l’espousicioun « Frederi Mistral Superstar, de Maiano à Stockholm » que la poudèn vèire is Archiéu despartementau de Pèiro-Vivo de Mount-Pelié jusqu’au 8 de fébrié 2025. Lou jour de l’inaguracioun, lou divèndre 18 d’óutobre passa, nous sian passeja un moumenet pèr amira lou biais qu’aquelo espousicioun avié estado alestido e quatecant sentiguerian lou besoun de ié tourna talamen avian encaro de causo de vèire. Quàuqui jour plus tard, se tenguè la sesiho dóu Counsistòri d’ivèr dóu Felibrige… is Archiéu despartementau de Pèiro-Vivo. Adounc es emé plasé qu’em’uno trenteno de majouralo e majourau pousquerian camina au mitan d’un fube de meraviho sourtido dóu founds lega is Archiéu erauten en 2020 pèr moussu Glaude Goyard. Aqui fuguerian aculi ‘mé gentun pèr lou cap-coumeissàri de l’espousicioun, Fanìo Reboul. Aquest cop, prenguerian lou tèms d’escouta lis entre-signe que Fanìo alarguè pendant quàsi dos ouro à-de-rèng. Lou premié cop nous diguè noste guide saberu « l’espousicioun es pas ‘no espousicioun biougrafico dóu Mèstre d’abord que la toco èro soulamen de counta ço que caup dins aquéu founs. Pamens avian lèu fa de coumprene que Frederi Mistral èro bèn au cèntre dis interès. De-segur s’agissié pulèu de l’ome que de l’autour que fuguè. Pamens, Mistral felibre, lou Felibrige, li primadié, l’obro, lou manejamen di dre, lou Tresor dóu Felibrige, sènso óublida lis adaptacioun de Mirèio à l’ouera e au cinema e l’inóublidablo estatuo de Mirèio e li noumbróusis estatuo e retra dóu Mèstre. Fau marca la presentacioun de la situacioun soucialo de Mistral, coume acò’s precisa dins lou flame catalogue distribuï pèr la librarié Un Autre Regard de Mount-Pelié, qu’èro entre fóuclore e sacralisacioun, mai proche de la segoundo que dóu premié. D’efèt à la fin dóu siècle XIXen, Frederi Mistral èro à soun pountificat. Dins Éuropo touto se couneissié, l’escrivan, lou pouèto, lo filoulogue, lou leissicougrafe, lou leissicoulogue vo encaro lou Vergèli de Prouvènço, coume i’avié mes Anfos de Lamartino. Mistral èro bagna de respèt, tant sarié meme de cop que i’avié de veneracioun. L’avian di la darriero fes, Marìo Mistral recebè un mouloun de letro qu’aduguèron la provo d’aquelo amiracioun. Pamens n’i’avié pas proun pèr faire en modo que se parlavo de Mistral o de la Reneissènço de la lengo d’o dins un libre que que siegue. En 1912, un tabléu mostro lou mounde bramant e aclamant Frederi Mistral is areno d’Arle en 1909, à l’óucasioun dóu cinquantenàri de Mirèio coume n’en temóunio uno pinturo à l’òli sus telo de Jóusè Belon. Lou tabléu presenta fuguè desroula à bèl espressi pèr lou mounde dóu Museon Arlaten, restaura un brigoun e fisa is archiéu despartementau d’Erau pèr l’espousicioun. Acò fai la mostro que d’ourganisacioun loucalo e naciounalo countribuïguèron à la reüssido d’aquelo espousicioun. Pamens, pamens crese que ço de reteni es la plaço centralo de madamo Marìo Mistral dins la vido de soun espous e belèu encaro mai après sa despartido. Se parlo aqui d’uno persounalisacioun mistico que la Véuso e soun oustau n’en fan l’óujèt. Mistral es santifica pamens es santifica tambèn lou vilage de Maiano que venguè un liò de culte e de roumavage. Marìo Mistral aguè de mau pèr assegura la gestioun de soun espous, pamens lou faguè d’un biais eisemplàri e menimous. En revenge se couneissié mens l’ome pouliti que part acò jamai vouguè èstre. Emai noun fuguèsse un ome apetega pèr la poulitico, la poulitico venguè devers l’ome. Mau-grat ‘cò Mistral sachè sèmpre garda lou Felibrige à la sousto de reviramen coume se n’en vèi en poulitico. L’espousicioun mostro tambèn li liame que Mistral entre-tenguè ‘mé d’àutris ilustre perouno que siegue Anfos de Lamartino, Anfos Daudet, Adóufe Dumas, emé lis editour tambèn e alia. Pèr acaba, vole dire que Mistral dounè à Prouvènço l’image que fai flòri dins lou cor di Prouvençau. Sa Prouvènço es la Prouvènço vertadiero qu’entre-tèn li racino de ço que sian, de ço que voulèn èstre. Acò a pas rèn de vèire emé la Prouvènço de Pagnol e la de Giono que moustrèron la Prouvènço coume lou mounde dóu Nord la voulien vèire. Un cop de mai, fasèn uno capelado grando e sincère pèr lou pres-fa meravihous coumpli pèr la colo dis Archiéu despartementau qu’alestiguèron aquelo espousicioun qu’es vesiblo, lou disèn tourna-mai, jusqu’au 8 de fébrié 2025. Soulide.
Vaqui, aro la crounico es acabado, vous doune rendès-vous la semano venènto. D’eici aqui, avanças d’un pas lèri. Tenès-vous fièr e gaiard. Vous brassège amistousamen. Brave mounde adissias !
felip