
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
LOU TRESOR DE FREDERI MISTRAL 1
.............................................
Brave mounde, bèn lou bon-jour en tóuti… Emé un milèime en quatre e en s’apielant sus lou devé de memòri qu’es la foudamento dóu Felibrige, festejan aquest an Fèlis Gras que nasquè en 1844, Jóusè d’Arbaud qu’espeliguè en 1874 et d’àutris ilustres escrivan et pouèto e de-segur… Frederi Mistral. E sèmblo qu’avèn pas tout di sus lou chantre de la segoundo Reneissènço de la lengo d’o. Emai aguèsse en man e mai souvènt encaro souto mis uei en versioun desmaterialisado lou Tresor dóu Felibrige, me siéu pausa la questioun de saupre de quent biais l’edifice fugué enaura. Pamens jamai aguère lou biais de trepassa l’estàdi de la questioun. Alor aquest an lou vouliéu faire, bouta pèr la necessita d’alarga ‘no counferènci pèr Forum d’Oc. Anan ié regarda de mai proche e d’en premié nous anan interessa à la leissicougrafìo. La leissicougrafìo councerno l’elabouracioun, l’alestimen di diciounàri emé la chausido dis unita leissicalo de trata, la metodo de sa descripcioun, li teinico en visto de la publicacioun, li rubrico particuliero : noum d’oustau, toupounimìo, sciènci, istòri e l’aurre. La leissicougrafìo es uno teinico mentre que la leissicoulougìo que sa matèri es lou leissique, li mot es uno sciènci. Adounc vous vau douna lou resumit de ço que troubère. Premier fau parla dóu calendié à respèt dóu pres-fa de Frederi Mistral. Sabèn qu’en 1848, Mistral, que manjavo dins si dès-e-vuench an, faguè un travai de couleite pèr Simoun-Jude Honnorat, un mege de Digno apassiouna de lengo qu’èro a ‘caba un diciounàri. Li tres voulume d’aquéu diciounàri espeliguèron entre 1846 et 1848. Malurousamen, dins l’entre-vau, lou mege de Digno, lou dóutour Simoun-Jude Honnorat se mourigué lou 31 de juliet 1852. Pèr faire courtet, sabèn que Mistral s’apielè sus soun travai pèr faire soun Tresor dóu Felibrige, coume lou faguè, avans éu, Honnorat. Jan Boutière cita pèr Jan-Glaude Bouvier nous dis, éu, que la debuto vertadiero dóu travail de Mistral coumencè en 1853. D’efèt, Mistral escriguè à Roumanille lou 21 de janvié 1853, sié sièis mes après la despartido d’Honnorat : « … diras à moussu Seguin que ié croumpe lou Diciounàri d’Honnorat. Acò’s pas ‘no farço ». Perseguiguè en disènt qu’èro pèr faire un Supplemènt pèr Honnorat, e pèr acò faire : « Óublidarés pas de faire apoundre uno man de papié blanc, es à dire vint-e-quatre fueio à la fin dóu darrié voulume ». Aquéu suplemènt fuguè ‘caba au mes de jun 1854, pamens, lou biais qu’aquéli fueio fuguèron rensignado fai la provo que i’aguè ges de roumpeduro entre lou suplemènt et lou Tresor. Avèn pièi quàuqui repère tempourau : au mes de mai 1861 : la letro -A es facho (letro à Anfos Dumas) ; 1863 : la letro -C coumencè ; au mes de mars 1870 : Mistral n’èro à la letro -N (letro à Pau Meyer) e en Juliet 1871, dins uno autro letre à Pau Meyer, es lou tour de la letro -S. Sian pièi en 1877 quand Mistral anounciè à Meyer que lou Tresor èro acaba mai que faudra encaro uno pichoto annado. Mistral escriguè : « Li siessanto fascicule dóu Tresor dóu Felibrige soun dispounible en dous voulume fort. Jan-Galude Bouvier nous diguè que Mistral sourtiguè d’aquelo aventuro soulaja, pamens alassa e subre-que-tout deficitàri de tres milo franc ». Se meteguè en bousco d’un prèmi. En 1890, óutenguè lou prèmi Jan Reynaud d’un mountant de dès milo franc que Gastoun Paris e Pau Meyer ie soun pas estrangié. Aquéu prémi fuguè emplega pèr apara la causo prouvençalo pamens pas pèr recoubra lou deficit qu’èro uno causo ja facho. Dins uno letro, Mistral diguè à Pau Marieton : « Me falié d’argènt pèr moun journau pantaia ». Mistral pensavo à l’Aiòli que fuguè publica de 1991 à 1999, tres cop dóu mes, lou 7, lou 17 e lou 27. En 1898, la premiero edicioun dóu Tresor fuguè quàsi agoutado. Pamens dóu vivènt de Frederi Mistral i’aguè ges de reedicioun. Fauguè espera 1932, annado de l’anniversàri centen de soun creatour pèr vèire uno nouvello edicioun dóu Tresor encò d’Edisud que Jan-Glaude Bouvier n’en signè la prefàci. Lou travai fuguè fa e bèn fa estènt que Mistral faguè ço que de coustumo es realisa pèr uno colo d’especialisto. Pèr acò, Jan Boutière agué lou fin mot : « De quent biais lou pouèto de Maiano qu’avié apoundu à soun bacheleirat pas qu’uno licènci de dre pousquè, sènso preparacioun especialo coumpausa, ‘’en vint an que trimè coume un satire’’, aqui soun si mot, soun Tresor dóu Felibrige, que ges de lenguisto proufessiounau aurien desavoua ». Pamens Frederi Mistral lou faguè. Capelado ! Li membre dóu Coumitat Nobel en Suedo reouneiguè aquéu pres-fa, bèn talamen que ié dounèron lou prèmi de Literaturo en 1904. Soulide.
Vaqui, aro la crounico es acabado e dich acò, vous doune rendès-vous la semano venènto e après la leissicougrafìo parlaren dóu travai que coumpliguè Mistral à respèt de la leissoucoulougìo. D’eici aqui, avanças d’un pas lèri e tenès-vous fièr e gaiard. Vous brassège amistousamen. Brave mounde adissias !
Felip