Lis Ermas - Teatre Prouvençau 1940

15 septembre 2021
Télécharger le podcast

TEATRE PROUVENAU 1940

Cars ami, lou bon-jour en tóuti. Sian à faire de recerco à l’entour dóu teatre d’o e particulieramen dóu teatre prouvençau, pèr la tempourado que se trobo après la desfacho de 1940, e encaro après la meso en plaço dóu gouvèr de Vichi. Alor, perdequé aquéli cerco ? L’idèio partigué d’uno necessita : la d’uno tèsi à l’entour de Carle Galtier que fuguè, de dela d’un pouèto, d’un escrivan, d’un museoulogue, d’un etnoulogue, un dramatisto tambèn. Se trobo que Galtier que demourè en Eigaliero, escriguè un parèu de pèço peraqui en 1940 e n’escriguè trento-cinq autro après. E la questioun venguè à l’esperit qu’èro de saupre se Galtier pousquè aprouficha de la poupularita dóu teatre e de mounte venguè aquelo poupularita en aquelo pountannado tihouso ? Pièi, coume se parlo dóu teatre d’o, aquélis interougacioun s’endevènguèron em’ uno autro que councerno la qualita di liame entre lis óucitan e li prouvençau. Poudèn toujour se demanda qunto es l’utilita d’aquelo questioun tambèn. Aqui, s’agis de coumprene l’istòri e pas mai. Sabès, aquelo lengo l’aman tóuti e sarié talamen bèu de s’entèndre entre nautre, sènso jalousié e marrìdi pensado, emé toulerènci e inteligènci, dins l’interès de la lengo e de la culturo nostro. Assaja de coumprene lou passat pòu permetre de basti l’aveni e aurian besoun d’afourti noste avejaire em’ óujeitiveta sus li diferènci que nous desseparon e tambèn sus li gràndi causo que nous recampon. Poudèn toujours pantaia d’acò... Vaqui l’estiganço...

Fau parti de la poulitico regionalisto de Vichi e dóu libre de Crestian Fauré que soun titre es L’Histoire culturelle de Vichy. D’efèt, entre li culturo de la Resistènci e la de la coulabouracioun, lis annado seguènt la desfacho de quaranto veguèron s’istala, au cor de de la Revoulucioun naciounalo, la culturo vichisto. Dins l’ambianço d’aquéu tèms, èro naturau de pensa que la decentralisacioun culturalo chausido pèr Vichy èro à mand de veni uno realita quand lou vichisme privilegiavo lis image d’uno soucieta ruralo, courpourativo e religiouso. Lou diguerian ja que lou teatre èro e es un mejan de requisto pèr espandi la lengo. Es un óutis vertadié que permet lou revelamen de la naturo umano que carrejo tóuti li courrènt de pensado e que pòu faire de coumunauta. Es pèr acò que fai l’óujèt d’uno survihanço de la part dóu poudé. Lou teatre marco tout ço que lou pople senton e refoulon de frustracioun. E mistral diguè : « Avèn dre de mau-dire aquéli que nous frustron ». Lou teatre èro aqui pèr acfaire. Dins lou countèste de 1940, li coumpagnié de jouine coumedian nascudo avans la guerre acabèron de prene soun envanc, rastelant un fube d’iniciativo, emai se quàuqui coumpagnié gardèsson soun autounoumìo à respèt dóu poudé.

Dins aquelo istòri dóu teatre, i’avié de mounde engaubia pèr beileja de troupo, coume Maurise Jacquemont e lou teatre di Quatre Sesoun que se venié assousta en zono libro, à Toulouso. Leoun Chancerel (1886- 1965) qu’èro un coumedian e autour francés que fasié de meso en sceno, foundè au sen dis escout de Franço la coumpagnié di Coumedian Routié, uno meno de teatre barrulaire que passejè lou teatre dins lou campagnòu. I’avié tambèn Juliano Peno, escais-noumado Juliano Dissel que recoustituïguè la Troupo dóu teatre d’o que l’avié creado à Paris en 1933. Soun repertòri èro tout en lengo d’o. Julieto Artrous et les Cigalous Rouergats avien tambèn un repertòri en lengo d’o. Fau pas óublida dins lou meme relarg L’Estélo de Bessou d’Enri Mouly que redoublè sis ativeta. Andriéu-Jaque Boussac, éu, iscriguè soun prougramo d’acioun felibrenco dins lou de la Revoulucioun naciounalo.

De-segur, la tiero es pas coumplèto. Pamens, ja, se poudèn rèndre comte que lou teatre d’o fasié flòri en aquesto pountannado. Noun soulamen lou teatre d’o troubè soun publi, mai li que n’èron li proudutour èron Óucitan e Felibre tambèn. Ço remirable, es que d’aquéu tèms, degun pensavo à cerca de garrouio en quau que siegue. Verai, i’avié de causo mai impourtanto, subre-tout la barbarié de la guerro. Pamens, lou cèu di relacioun entre Prouvençau e Lengadoucian s’ennivouliguè tre la Liberacioun en 1945, quand se créè l’Istitut d’Estùdi Óucitan. E aqui n’i’aurié pèr n’en faire de crounico à jabo. Iéu vole garda l’espèr au cor de vèire lou mounde s’acourda e douna l’eisèmple i jouìni generacioun... Sarié-ti trop demanda ? Iéu vole crèire que noun. Soulide.

Vaqui, pèr aro es acaba. Vous doune rendès-vous la semano venènto pèr uno nouvello crounico. Vous

souvète uno semano di bello e d’eici aqui, tenès-vous fièr e gaiard. Brave mounde, adessias !

Felip