Lis Ermas du 11 septembre 2019 par Felip Reig - Estiéu de Criso

13 septembre 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 11 Septembre 2019 Estiéu de Criso - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 11 Septembre 2019 par Felip Reig

Estiéu de Criso

Cars ami, brave mounde, bèn lou bon-jour en tóuti ! Belèu avès agu un bèl estiéu e aro sias lèst pèr tourna prene lou coulas. Nautre à Mandiuel, proche la vilo de Nime pendènt l’estiéu, avèn vist e ausi li canadèr faire d’ana-veni sènso relàmbi tout lou sanclame dóu jour pèr ana amoussa li fiò ravajaire qu’an gasta nòsti garrigo. Ato ! pièi, li fiò se soun pas aplanta i garrigo, mai an ataca lis oustau e li bèsti qu’avien pas rèn demanda. Ansin mai de tres milo eitaro arboura e de garrigo nous an manda lis assabé crema de la naturo negrihouso. Èro encaro parié à la debuto dóu mes de setèmbre. E i’a pas qu’uno bono chavano que poudrié metre lou mounde foro dangié. Sara un camin roumpènt pèr faire en modo que la naturo tournèsse coume èro i’a encaro quàuqui mes. D’un coustat, i’a ço que se vèi : lis aubre coumbouri, calcina e la garrigo negro dóu fum. D’un autre las, en chifrant un brigoun se fau dire que i’a en mai, de counsequènci segoundàri. Dins tout acò, i’a de vitimo agricolo estènt que de champ soun esta estubassa e pèr quant is indannita, lou mounde li podon ana querre en galero e, ma fisto, enant aqui manjaran de regardello. Pèr recampa li sòu, soun fort li franchimand dóu gouvèr, pamens pèr n’en douna, es de figo d’un autre panié. Basto, fau tambèn prene en comte la floro qu’a despareigu. Emai i’aguèsse ges d’enventàri serious, es de cregne que i’a de flour o de planto de garrigo que reveiren pas. E pas soulamen la floro, segur estènt qu’es tout-parié pèr la fauno, l’animalun. Se saup deja que i’a de perdo impourtanto encò dis anfibian, di reptile, dis insèite. L’aucelun an pas pus d’oustau tambèn. Estefan Arnassant, un ecoulogue nimesen dis que faudra uno vinteno d’annado pèr tourna ausi gasaieja de gai, d’auriòu, de pi vo de picatèu. La naturo en soufrènço venguè tout-d’uno silenciouso. Dóu cop, l’ecoulougìo n’en prenguè un cop di mai serious. Mai sian siau, d’especialisto se van pausa la questioun d’uno messo en obro païsagiero. La Costiero nimesenco es nafrado e es pas deman que lis aubre faran tourna-mai d’oumbro. Coume que siegue, faudra de tèms pèr tourna à-n-uno situacioun aceitablo. Lou mai triste d’aquel afaire es qu’un ome, un paire de famiho, un espous a perdu la vido. Lou quoutidian Midi Libre titrè : « Franck est parti en héros ». Quent tristun, quent charpin se poudè legi dins lis uie di vuetanto pilote de la baso de segureta civilo, lou siès d’avoust 2019, quand tóuti s’èron recampa pèr acoumpagna Franc dins soun darrié viage. Lou jour de l’acidènt, lou dousen d’avoust, aquèu jour d’aqui, nautre erian proche la clausuro dóu jardin e regardavian l’espesso tubasso blanco e griso que s’enauravo paloutamen. Subran, à-n-aquèu nivoulas que creissié à bèl èime se venguè apoundre un autre mens gros, mai negre qu’es pas de dire. Tant-lèu, ma noro regardè sus soun telefounet e ié veguè lis image d’aquéu nivoulas tubassiéu. Èro de crèire que quaucun filmavo la sceno. Fauguè pas gaire de tèms pèr coumprene qu’un grand malur èro arriba. Efetivamen, un moumen après avèn aprés qu’un pilote qu’a noum Franc Chesneau s’èro tua dins l’escrachado de soun traquèr. Alor, segur que nous venguè à l’esperit la questioun de l’óurigino dóu fiò. Es de bon que la secaresso e la calourasso podon avantaja l’abrasamen de l’erbeto. Pèr pau que l’auro boufe coume fuguè lou cas pendènt aquéli jour d’aqui, imaginas eisadamen li counsequènci. Vouliéu e vole pas crèire qu’uno man criminalo pousquèsse èstre l’encauso d’acò. Pamens avèn de mau à coumprene que i’ague agu mant un despart de fiò au cop. Lou malastre semblè encaro mai prefound. Nòsti pensado amistouso van de-vers la famiho e lis ami d’aquel ome que fasié un mestié remirable. Es verai que li coundicioun de piloutage dins li nivoulas de tubeio podon aumenta lou risque de roumpeduro dóu soustèn de l’avioun, valènt-à-dire lou desrroucage. Pamens, Franc èro pas un piloutin, avié forço esperiènci. Acò mostro lou dangié dóu mestié di pilote-poumpié. Lou dimenche dès d’avoust, lou vilage de Genera, rendeguè un darrier óumage à soun enfant. Lou fau pas óublida aquel ome, aquel erò. Avèn agu un estiéu de criso. Mant un despartemen de noste relarg soun esta gravamen pertouca. Belèu qu’aquest an, lou mot vigilànci prenguè uno nouvello dimensioun. Vaqui, aro la vosto emessioun es acabado. Se capiterèn mai la semano venènto. D’eici aqui que lou tèms fuguèsse doucinèu. Brave mounde, adessias ! Felip Reig (Mèstre d’obro dóu Felibrige) Sènso relàmbi = sans relâche ; tout lou sanclame dóu jour = toute la journée ; Desrroucage = décrochage ; piloutin = apprenti-pilote.