Lis Ermas du 12 juin 2019 par Felip Reig - Assaut de danso

13 juin 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 12 Juin 2019 "Assaut de danso" - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Assaut de danso

Cars ami, brave mounde, la bono saludo en tóuti ! I’a pas gaire de tèms, à la coumençanço dóu mes de mai, nous gandiguerian à z-Ais-de-Prouvènço pèr ié vèire se debana lou passage di nivèu de galoubettambourin e fuguerian sousprés de vèire lou gàubi di musicaire, subre-tout pèr aquéli que reüssiguèron soun tresen nivèu. Desanant, après qu’ague pres counsciènci dóu travail qu’es de coumpli pèr mestreja aquélis istrumen, segur que marcarai mai de respèt pèr aquéli que tocon lou tambourin. Adounc, èro lougi en seguido d’acò, bouta par la curiouseta, d’ana vèire l’assaut de danso que se debanè à Nime, à l’Istitut d’Alzon lou dijòu de l’ascencioun. Èro un cop de mai la Federacioun Fóuclourico Mediterragno qu’èro l’ourganisarello de la journado. Pèr ço qu’es de la danso, pèr counèisse sis óurigino, es de saupre que la danso rintrè dins la fourmacioun militàri tre que Francés Michèu Le Tellier, marqués de Louvois e Secretàri d’Estat de la Guerro de Louïs XIV creè li Coumpagnié de Cadet Gentilome en 1682. Acò permetié i sóudat de garda la formo fisico e mouralo. En 1751, l’Escolo militàri de Paris adóutè aquélis ensignamen i coustat d’àutri disciplino coume li matematico, l’istòri, la gramatico, li cous de fourtificacioun e lis eisercice dóu cors coume l’escrime e l’acroubacìo equèstro. Fuguè la premiero guerro moundialo que veguè s’acaba la pratico de l’escrime e de la danso dins l’armado. Après 1918, es dins lou Miejour que se vesié lou mai de traço de l’ensignamen militàri emé de soucieta de danso de farandoulo. Demié li dato impourtanto, en 1953, Ama Longuet dóu group di Farandoleurs cheminots nîmois e Regis Vigne decidèron de tourna prene la tengudo d’assaut de danso e la remes01so de diplomo de prevost e mèstre de danso pèr assegura la qualita de l’ensignamen. Lou premier assaut se debanè à Nime, à la galarié Jule Salle sus lou balouard Amirau Courbet. En 1959, nasquè la Federacioun di Group tradiciounau dóu Sud-èst. E en 1961, l’Ordre di mèstre de danso dóu sud-èst assetè uno tiero de pas impausa pèr la gavoto pèr li candidat au prevost e uno pèr la gigo pèr li candidat au grade de mèstre de danso. Le cinq de mai 1963 fuguè ourganisa lou premier assaut de la Federacioun di Group tradiciounau dóu Sud-èst que venguè óuficialamen la Federacioun Fóuclourico Mediterragno en 1969. La memo annado, l’Ordre di mèstre de danso dóu Sud-èst decidè de prene coume moudèle pèr la gavoto, aquelo que se dansavo en Aramoun, dins Gard. Franc d’acò, lou dijòu trento de mai passa, tre lou matin, dès-e-nòu candidat passavon l’eisamen de prevost e de mèstre de danso emé li pas impausa, es à dire sènso musico. À-n-uno ouro dóu tantost, avèn vist l’inaguracioun de l‘espousicioun alestido pèr lou mèstre de danso, Mirèio Ribes, à l’entour de l’istòri di diplomo de danso. Lis elegi e Ama Alliès, lou presidènt de la Federacioun, faguèron cadun sa dicho emé quàuqui mot en lengo pèr l’urous presidènt. Lou tantost avèn vist lou passage di candidat pèr lou grade de prevost emé la gavoto - i’avié tres danso de faire - e pèr lou grade de mèstre emé la gigo, uno danso longo, teinico e fisico. Sus li douge candidat pèr lou grade de prevost, dous reüssiguèron, mentre que pèr lou grade de mèstre, i’avié sèt candidat e un soulet, o pulèu uno souleto chato daverè lou diplomo. Tres candidat óutenguèron uno mencioun que se dis ‘’ounourablo’’, valènt-à-dire que reüssiguèron li pas impausa pèr uno annado de tèms. Dóu cop, l’an que vèn auran pas que l’esprovo de la gigo de passa. En 2016 e à la demando de la Federacioun Fóuclourico Mediterragno, lou Counsèu de l’Ordre di mèstre de danso dóu Sud-èst meteguè en plaço un nouvèu diplomo de danso que valido la capacita d’un candidat de beileja uno repeticioun e trasmetre de noucioun de baso e des pas dóu repertòri, es à dire que la remesso en questioun es permanènto. De vèire tout acò es un biais de se rèndre comte dóu travail coumpli, qu’acò’s pas la buteto. D’aqui-enant, agacharai plus dóu meme biais qu’avans li dansaire e li dansairello quand me sara douna de n’en vèire tourna-mai. Soulide. Vuei, vole parteja aquelo preso de counsciènci sus lou respèt qu’avèn de marca de-cap i musicaire e i dansaire. Fau sourti dóu coumun la musico, la danso… sènso óublida lou teatre. Vaqui, aro la vostro emessioun es acabado. Se capiterèn mai la semano venènto. D’eici aqui avanças d’un pas lèri e que lou tèms fuguèsse doucinèu. Brave mounde, adessias !

Felip Reig (Mèstre d’obro dóu Felibrige)