Lis Ermas du 1er Mai 2019 par Felip Reig - Li femo au tèms di Catedralo, Alienor d’Aquitàni

02 mai 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 1er Mai 2019 Li femo au tèms di Catedralo, Alienor d’Aquitàni - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 1er Mai 2019 par Felip Reig

La semano passado assajavian de defini la coundicioun de la femo à l’age mejan e veguerian qu’èro maleisa de lou faire. Pamens, i’a-n-uno femo que marquè sou tèms d’un biais particulié : Alienor d’Aquitàni que nasquè en 1122 o 1124 e que mouriguè en 1204. Avié mai de 80 an. Un jour, après qu’aguèsse rendu un devé à l’universita à l’entour d’aquelo grando damo que fuguè rèino dous cop, Gile, lou proufessour, escriguè : « alor, ges de defaut ? » Me rendié à l’evidènci, n’aviéu trouba ges. Me diguère dintre iéu qu’aviéu manca quicon. Dóu cop, me boutère à estudia pèr lou menut la vido d’aquelo femo, feleno de Guihèn IX. Alienor reçaupeguè uno educacioun qu'èro destinado en tóuti li femo noblo d'uno epoco que veguè l'espelido de l'amour courtés1 e l'espandimen de la lengo d'O. Soun fraire, Guihèn Aigret mouriguè en 1130, ço que fasié d'elo, l'eiretiero dóu doumèni d'Aquitàni. Afougado de latin, èro tambèn uno cavaliero de trìo e s'adounavo à la casso. Avié pas que quinge an quand lou sièu paire, qu'èro pamens uno forço de la naturo, mouriguè de la malautié, à trento-vuech an, lou voungen d'abriéu 1137, un divèndre sant sus lou camin de sant Jaque de Coumpoustello. Eiretè d'un doumèni que s'espandié sus quàsi dès-e-nòu de nòsti despartamen atuau, en Aquitàni, en Peitau e en Gascougno, bèn talamen, que lou rèi de Franço aguè ges d'acès sus lou front de l'oucean Atlanti. Pamens aquéli terro fuguèron pas jamai restacado à la courouno de Franço e Alienor n'en demourè la duchesso. Belèu, èro pas pèr cop d’astre que lou rèi de Franço Louïs VI lou Gros la maridé à soun fiéu cadet que ié disien Louïs tambèn. Vaqui l’estiganço. Louïs VI Le Gros, qu’èro lou rèi de Franço, malautejè. Soun fiéu einat qui ié disien Felipe, qu'èro deja rèi assoucia desempièi 1129, mouriguè en 1131 quand traversié un bras de Seine à gaso. Adounc, fuguè lou cadet Louïs que fuguè courouna rèi. Ansin, quand lou paire d'Alienor defuntè, soun segnour, lou rèi Louïs VI, aguè lou devé de proutegi sa vassalo e la maridè à soun fiéu Louïs qu'avié tout bèu just sege an, lou 25 de Juillet 1135, à la catedralo sant Andriéu de Bourdèu. Louïs èro un jouvenome fréule e mistoulin que se voulié destina à-n-uno vido mounastico que n'en fuguè davera pèr s'asseta sus lou trone de Franço. Alienor èro d'uno bèuta trelusènto e d’acò, n'èro en plen counsciènto. Aguè ges de proublèmo pèr impausa em' abileta e finesso si voulounta à soun espous quand vendra soulet rèi de Franço, souto lou noum de Louïs VII, lou vueten d'Avoust 1137, quand Louïs VI defuntè. Pamens quand lis espous s’entournèron de la dousenco crousado, en 1152, Louïs VII la repudiè, après qu’Alienor i’aguèsse douna dos fiho : Marìo de Franço (1145-1198) e Alis de Franço (1151-ap.1195). Emai i’aguèsse ges de provo, un doute sus la fidelita d’Alienor nasquè à respèt dóu liame estré que i’avié entre la rèino e soun ouncle Ramound de Peitiéu qu’Alienor retroubè à-n-Antiocho au moumen de la crousado. Alienor esperè pas pèr se tourna marida. E lou premié roussignòu printanié anounciè la nouvello lou 18 de mai 1152. Emai un desenau d'annado li desseparavon, Alienor se maridè 'mé Enri Plantagenêt (11331189), comte d'Anjou, dóu Maine de Toureno e du de Nourmandìo, mai tambèn vassau dóu rèi de Franço. Alienor demourè duchesso d'Aquitàni e coumtesso de Peitiéu, mai venguè tambèn coumtesso d'Anjou e duchesso de Nourmandìo. Pamens, Alienor se maridè sènso n’avisa Louïs VII. L’aurié degu faire estènt que dóu cop venguè vassalo dóu rèi de Franço. Entre qu'aprenguè la nouvello, Louïs lou seten descasè2 soun vassau Enri Plantagenêt de tóuti si fièu3 francés. Li Capecian e li Plantagenêt visquèron en malamagno enjusqu'à la mita dóu siècle XV. Pèr William de Newburgh, crounicaire tras-que bèn assabenta d'aquéu tèms, la cancelacioun dóu maridage sarié la resulto d'uno entendudo entre Alienor e l'archevesque Ugue de Sens e Louïs ié counsentiguè. L'aurié-ti fa s'avié couneigu la sourtido d'aquel afaire ? Belèu que noun. Pamens, se fau engarda de tourna tricouta l'istòri e leissen ié, à-n-aquelo istòri, lou benefice dóu doute. Emai Enri mangèsse pas que dins si vint an, èro un ome saberu que fasié mai que soun tèms. En mai d'acò, parlavo la lengo d'o. La semano venènto, veiren ço que fuguè la vido d’Alienor que venguè rèino d’Anglo-Terro. D’eici aqui tenès-vous fièr e gaiard e que lou tèms fuguèsse doucinèu. Brave mounde, adessias !

Felip Reig (Mèstre d’obro dóu Felibrige)

1 L'amour courtés = l’amour courtois ou fin’amor, thème privilégié de la poésie des troubadours.

2 Descasè = déloger, destituer, chasser, expulser, ici conjugué au passé simple, troisième personne du singulier.

3 Fièu = fief (de tóuti si fièu = de tous ses fiefs). Mais "fiéu" = fils.