Lis Ermas du 29 Mai 2019 par Felip Reig - La fèsto de la Maio à Fourco

31 mai 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 29 Mai 2019 La fèsto de la Maio à Fourco - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 29 Mai 2019 par Felip Reig

LA FÈSTO DE LA MAIO À FOURCO. Cars ami, brave mounde, bèn lou bon-jour en tóuti. Vuei, nous anan passeja à Fourco. Es dins aquéu bèu vilage gardés que sian ana vèire la fèsto de la Maio, lou dimenche cinq de mai passa. Aquelo fèsto èro ourganisado pèr l’Escolo d’Argènço, un group de mantenènço di tradicioun nostro, e escolo sòci dóu Felibrige. La toco d’aquelo fèsto es de rèndre óumage à-n-uno chato, uno picoto rèino, elegido pèr un annado. Aquelo coustumo se fai despièi 1984. En 2019, èro la trento siesenco fèsto de la Maio e la chatouneto qu’a noum Clemènço es estado festejado. L’óurigino d’aquelo fèsto, la fau ana querre encò di Grè dóu tèms de la divesso Maïa qu’èro la divesso nourriguiero e de la vegetacioun. Encò di Rouman aquelo divesso terrèstro èro festejado dins de fèsto esclusivamen femenino. À l’age mejan, lou mes de mai èro lou mes de l’amour emé uno energìo cousmico qu’envahiguè li cor e dounè d’envanc à la naturo touto qu’intravo dins un cicle nouvèu. De chatouneto èron courounado emé de flour e cargavon un coustume de sedo. Aquelo fèsto se sarro tambèn di Massalioto, es à dire de Massalia, entendès Marsiho. Lou quartié de la Bello de Mai n’es un temouniage. Ā Fourco, lou coustume de la chatouno es evidentamen d’un blanc inmacula e blèuge e Clemènço èro couifado d’un beguin, valènt-à-dire d’un bounet estènt qu’a panca pres la gravato. Fau dire que, de cop que i’a, li pèu de la chatouno soun pas proun long pèr faire li bandèu. Aquéu jour d’aqui, lis enfant soun li rèi dóu vilage. Soun éli que fan d’animacioun. La journado dóu cinq de mai passa coumençavo emé la messo. La Maio rintrè d’un pas soulenne dins la glèiso acoumpagnado pèr Danis e s’anè asseta sus soun trone. Après l’óufice religious, lou mounde se soun mes en rèng pèr fourma un passo-carriero. Pamens aquéu jour d’aqui, i’avié un ventaras qu’escoubihavo li carriero, e, ma fisto, fasié pas caud, bèn talamen que pèr la ceremounié d’acuei e l’aperitiéu se falié amaga dins li paret de l’auditourion "di dous Rose". De coustumo, la fèsto se debano sus lou parvis de la Coumuno, en plen èr, pèr bèn marca lou printèms. Aquest an, avèn nouta la presènci de Naïs, la gènto rèino d’Arle e sa Damisello d’ounour e tambèn la de Coulino Boyer la poulido rèino dóu Riban de Mouriès que soun tóuti dos li feleno de Marcèu Cazeau, lou pastre dis Aupiho. Lou Felibrige èro tambèn representa ‘mé la presènci di felibre majourau Gui Chaptal e Gabriéu Brun. L’escolo d’Argènço e sa cabiscolo Patricia Disset avien counvida de group de danso dóu relarg emé de representant d’àutri vilajoun que festejon tambèn sa pichoto Maio. La dicho de Gile Dumas, lou bèu maire de Fourco èro, un cop de mai, tras-que pertinènto, e parlant dóu mounde vuei, diguè : « Avèn besoun de certeso, d’estableta car poudèn pas basti nòstis oustau sus de sablo mouvedisso. » E dóu cop, pausè de questioun : « En de que cresèn vuei ? Quènti soun nòsti valour ? Quent es noste eiretage ? De que fau apara qu’es essenciau ? » Autant d’interrogacioun e de prepaus sena que podon naisse pas que dins un esperit di grand, clar-vesènt e gounfle de sapiènci. Lou tantost, s’es debana un espetacle de danso. Sus lou pountin, i’avié, emé li musicaire dóu Cordon camarguais cènt vuetanto enfant que se soun escacalassa dóu rire tout l’après-dina. Pèr teni tout aquéu mounde d’à mènt, i’avié de grame à tria. Pamens, tout s’es passa d’un biais agradiéu e se sian coungousta de la resulto dóu travail de preparacioun coumpli. Celino Faisse, la presidènto de l’Estello de l’Aveni d’Arle avié passa Rose emé sa troupeto pèr veni baia d’ajudo à l’Escolo d’Argènço. Li picamen de man dóu mounde an rendu un bèl óumage au travail coumpli. Dève dire que pèr quant à iéu, ço qu’ai vist èro, de moun vejaire, la fèsto mai bello estènt qu’èro la fèsto de l’Autenticita, emé un grand A. De vèire tóuti aquélis enfant dansa ensèn fuguè un chale vertadié, uno joio que-noun-sai. Se n’en fau souveni d’un moumen parié quand lou tèms s’ensourni e que lis idèio soun pèr orto. Vaqui, aro vosto emesioun es acabado. Pas de làgui, se capiterèn mai le semano venènto. D’eici aqui tenès-vous fièr e gaiard e que lou tèms fuguèsse doucinèu. Brave mounde, adessias !

Felip Reig (Mèstre d’obro dóu Felibrige)