Lis ermas du 5 Juin 2019 par Felip Reig - La Courso de satin

08 juin 2019
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - Ce 5 Juin 2019 La Courso de satin - Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00

Lis ermas du 5 Juin 2019 par Felip Reig

LA COURSO DE SATIN Cars ami, brave mounde, la bono saludo en tóuti ! Aquesto semano, es en Camargo que nous anan passeja. D’efèt, vous vole parla de la Courso de Satin que lou Coumitat di Fèsto d’Arle ourganiso chasque an. Pamens, premié, es de saupre que despièi 1529 la Courso de Satin a traversa li siècle e acò empacho pas que li cavalié que ié participon la volon sèmpre gagna ribounribagno. Mai fau coumença pèr la debuto. Ansin, Frederi Bon e Clemènço avien counvida lou mounde encò de sa manado, un bèu tenamen au Sambu, proche la Tourre dóu Valat, lou dimenche dous de jun, pèr passa la journado e viéure un moumen tradiciounau emé la presènci de la gènto rèino d’Arlo, Naïs Lesbros qu’èro acoumpagnado de si damisello d’ounour. Dins lou prougramo, i’avié, lou matin, un councours de ferrado à l’anciano e douge manado i’an participa. Lou sabès, s’agis pèr quatre cavalié de courseja un anouble - un bioulet d’un an -, de ié baia un cop de ficheiroun pèr lou faire cabussa. Un gardian a lèu fa de sauta de soun chivau e de se traire pèr sòu pèr inmoubilisa la bèsti. La jurado se coumpausavo de Nanoun Lambert, clavairis de la Counfrarié di Gardian, Frederi Lescot, lou presidènt de la Counfrarié et Gui Chaptal, capitàni de la Nacioun Gardiano. Aqui, tout èro nouta, despièi la presentacioun dis equipage e la qualita de la coursejado, enjusqu’à la realisacioun dóu cop de fèrri e de l’imoubilisacioun de l’anouble. De-segur, lou fau faire à-n-un endré précis, ni avans, nimai après. Fuguè la manado Bon que rempourtè lou pres que lou meteguè tourna-mai en jo estènt qu’èro la manado que reçaupeguè lou mounde e que li cavalié ‘ron sus soun terrin emé si pròpri bèsti. Dóu cop, lou pres revenguè à la manade Listel. Franc de la manado Bon, souleto la manado di Mountiho que soun pelot es Bruno Quet avié reüssi à pourta lou cop de fèrri, mai en foro di limito impausado e acò countè pas. Avèn vist un cop de mai que la ferrado à l’anciano demando forço dispousicioun e, ma fisto, aqui s’agis pas de bachiqueleja estènt que lou mestié de gardo-bèsti es pas lou pater dis ase. Ato ! pièi, se n’en manco. Lou tantost avèn agu lou carroussèu dis amazouno de l’antico Counfrarié de Sant-Jòrgi que nous an moustra ‘mé gàubi soun saupre-faire pèr mena un chivau. Aqueste jour d’aqui, dins lou cèu linde i’avié ges d’avioun. Pamens un parèu d’aucèu de rapino s’èron counvida à la fèsto e voulastrejavon en fasènt lou tourloudoun sènso relàmbi. Li cavaliero pourtavon l’eso e lou riban. L’aureto rendié supourtablo aquelo journado qu’anouciavo l’estiéu e gounflavo sa jupo, arribant à bèlli fes à li retroussa un brigoun, leissant aparèisse un tros de soun coutihoun blanc. Lis arlatenco, noumbrouso, éli, avien pas óublida de prene soun oumbriero. Es esta pièi lou tour de vint-e-sèt pichot que faguèron un councours de maniableta. Éron aja de sièis à douge an e dève dire que siéu iesta candi davans la gràci e lou talènt d’aquélis enfant. Acò èro tras-que bèu. Venguè pièi lou moumen espera pèr lou mounde : lou di courso. La distanço èro de quinge cènt mètre, vo pau se n’en mancavo. Premié la courso de la Taiolo. Es duberto en tóuti li raço de chivau que que siegue e de mounte que vengon e lou vincèire gagno uno taiolo roujo. La courso dóu Pèu-blanc es reservado i camargo emé li papié e lou chivau pòu èstre ensela vo noun. La Courso de Satin es reservado pas qu’i chivau de raço camargo que soun mounta à crus, es à dire, sènso selo. Lou cavalié vo la cavaliero que gagno reçaup uno cherpo broudado d’or que sa replico es espausado au Museon arlaten en Arle. La gardo uno annado de tèms. E pèr la counserva definitivamen, fau gagna la courso de Satin tres annnado à-de-rèng. Es la courso mai prestigiouso. Lou group de musicaire de Lunèu que soun noum es la Malaïgo d’Or animè la journado. Osco is ourganisaire e à nòstis oste que reçaupeguèron lou mounde d’un biais requist e longomai ! Vaqui, aro vosto emessioun es acabado. Pas de làgui, se capiterèn mai la semano venènto. D’eici aqui avanças d’un pas lèri e que lou tèms sieguèsse doucinèu. Brave mounde, adessias !
Felip Reig (Mèstre d’obro dóu Felibrige)