LIS ERMAS DU 5 MAI 2021 PAR FELIP REIG - LI SCIÈNCI COUGNITIVO

06 mai 2021
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes - 5 mai 2021

- Rendez-vous sur le 92.2 ou www.radionimes.fr tous les Mercredis à 6h00, 13h30 et 19h00.

Lis ermas du 5 mai 2021 par Felip Reig.

_______________________________________________________________________

Cars ami, bèn lou bon-jour en tóuti. I’a quàuquis annado d’acò, li sciènci cougnitivo, dounc, aquéli que
soun ligado à la couneissènço, faguèron un prougrès grandaras e venguèron au rescontre di sciènci de
l’ensignamen. Tout venguè que de cercaire dóu mounde entié se boutèron, poudrian dire s’óupilèron à
cerca à l’entour de la mecanico dóu cervèu. L’imajarié medicalo ié baiè uno ajudo di mai preciouso.
S’avenguè que brigo à brigo se sabié toujour miéus coume la mecanico cerebralo marchavo. Li
néurosciènci countribuïguèron à ‘juda pièi lou mounde de l’ensignamen. M’anas dire : de qunt biais ?
Premié sabèn vuei que fau tua lis estereoutipe, li representacioun, tóuti aquéli fàussi cresènço que ié dison
de néuromite. Quant de fes ausiguère : « Quand sian vièi, poudèn plus aprene que que siegue » « Ai ges
de memòri », « li femo podon faire mant uno causo en meme tèms e lis ome noun poscon », « Quand
aprenèn quaucarèn, jamai l’óublidèn », e alia. Tóuti aquélis idèio se soun ancrado prefound dins lis esperit
e acò fai d’empacho pèr coumprene lou demai. Adounc fau èstre prudènt e faire targo subre-tout que lis
idèio en question, la coumunauta scientifico n’en faguè jamai la demoustracioun.
Pèr eisèmple, se fau dire qu’es pas poussible de faire dos causo en meme tèms. De cop que i’a poudèn
crèire que lou poudèn faire. Pèr dire lou verai, avèn uno tras-que marrido couneissènço de se-meme. La
souleto eicepcioun interesso tout ço que fasèn d’un biais autoumati, coume coundurre la veituro e canta
uno cansoun pèr eisèmple. En revenge poudèn pas coundurre e souna quaucun au telefounet, estènt que
poudèn pas vèire lou clavié e la routo en meme tèms, nimai pensa à ço que vesèn, analisa e prene de
decisioun e charra ‘mé quaucun. Es uno errour de crèire que lou poudèn faire.
Dóu meme biais, quand avèn après quicon, lou moumen que l’óubli es mai impourtant es just après
l’aprendissage. Es de saupre qu’avèn dins la tèsto peraqui entre 85 e 100 milliard de néurone dins lou
cervèu e autant de celulo glialo que soun rôle es d’abali li néurone, de li proutegi, de neteja en cas de mort
néuronalo e faire en modo que l’enflus nervous traversèsse lou mai vite li néurone et son rôle es
determinant. Adounc, emé tout ço qu’avèn dins lou clos, es coume uno fourèst que la poudèn pas traversa.
Quand aprenèn de causo, acò revèn à faire de camin dins la fourèst. Pamens se fasèn rèn, l’erbo tourno
à crèisse, pièi, li bartas e d’aubre enfin e acò vèn tourna-mai uno fourèst. Vèn necite de reativa lou maiun
néurounau, d’entre-teni li camin regulieramen pèr ancra lou sabé e ametre que l’óubli es quicon de
nourmau.
Pèr la memòri es tout-parié. N’i’a que dison qu’an plus de memòri. Acò se pòu pas estènt qu’avèn cinq
memòri. Premié, la memòri de travail. Es aquelo que turbino sènso relàmbi, que chifro de-longo. La
memòri prouceduralo que ié caupon tòuti lis autoumatisme, es à dire ço que fasèn sènso se n’en rèndre
comte. I’a pièi la memòri semantico. Es la de la leituro e de la couneissènço. La memòri episoudico es la
de l’istòri persounalo dou mounde. Pamens cade cop que quaucun se ramento de soun enfanço, i’a uno
defourmacioun dóu souveni. Valènt-à-dire que quand un autour conto soun enfanço, dis sa verita e pas
fourçadamen la verita. Pèr acaba i’a la memòri sensourialo tambèn. Es pas de durado, pamens marcho
que que siegue l’enfourmacioun de reteni.
Encaro uno causo, quand lou moude vous dison que passa un certan age, poudèn plus aprene. Acò’s uno
fausso cresènço tambèn, estènt que lou cervèu demoro plasti la vido touto d’uno persouno. La plasticeta
dóu cervèu es lou biais que li tarnavello podon faire se couneita entre éli li néurone. Lou dise un cop de
mai s’agis pas d’avé de miliard de néurone, mai de li poudé couneita. La couneissènço vèn de la facileta
pèr faire de maiun emé li néurone.
Vaqui, alor es de saupre que i’a de néuromite que li poudèn destouca eisadamen e n’i’a d’autre que soun
mal-eisa de trouba. E n’i’a encaro quàuquis-un que fan de resistènci, qu’an la pèu duro e que vèn lèu
tihous pèr li creba. Alor, mesfisas-vous d’aquéli ideoulougìo.
Fau pas counfoundre : pas reteni quicon e lou pas voulé aprene. La diferènci es la moutivacioun e
l’atencioun que fau pas prene pèr uno incapacita. Tout acò pèr dire que lis òutis que baion d’ajudo pèr
ensigna prenon en comte aquéu biais de vèire. Vuei, li metodo d’ensignamen soun asatado au miéus au
biais que lou cervèu marcho. La chausido de la metodo pèr ensigna coustren lou cervèu dis estudiant à
s’asata à la situacioun. Lou miéus es quand la metodo s’endevèn emé lou biais naturau que lou cervèu
marcho. Soulide. Segur que i’’aurié de mouloun de causo de dire sus aquel item e lou poudèn pas faire
aqui. Alor vous souvète un bon aprendissage e dise mi gramaci sincère e calourènt à dono Valerìo
Ferrandez que nous baiè tóuti aquélis enformacioun à l’unversita.


Vaqui, pèr aro es acaba. Pamens, vous doune rendès-vous la semano venènto pèr uno autro crounico.
D’eici aqui, tenès-vous fièr e gaiard e basto que lou tèms fuguèsse doucinèu. Brave mounde, adessias !