L'ABRIVADO - LIS ERMAS

19 novembre 2026
Télécharger le podcast
Cette semaine: "L’ABRIVADO"

Bràvis ami, lou Felip vous souvèto lou bon-jour… Aquest an, moun vilage de Mandiuel fuguè encarga d’ourganisa la finalo dóu councours d’abrivado prougrama pèr la coumunauta d’agloumeracioun de Nime-Metropòli. Avian previst un percours que sa distanço testejè ‘mé li milo cinq cènt mètre e i’avié sèt manado. Alor justamen, me diguère dintre iéu que i’a belèu de mounde que sabon pas de mounte vèn aquelo tradicioun. Premié, es de saupre qu’abriva es un verbe de lengo d’o que vòu dire acelera, se despecha vo faire courre. L’abrivado es uno tradicioun que repetis li gèste di gardian quand menavon li biòu de sa manado is areno. Dounc que mostro coume se debanè lou trasfèrt di biòu de si prat enjusqu’is areno mounte i’avié la courso. D’efèt, à passa tèms, quand lou siècle dès-e-nòu s’amoussè e que i’avié ‘no courso camarguenco falié mena li biòu d’à pèd, estènt que i’avié pancaro ni de camioun, nimai de càrri. Dins li prat de la manado, un cop sourti dóu troupèu, li biòu èron recampa e li cavalié lis enmaiavon, es à dire lis encadrèron entre de chivau e fasien en modo qu’aucun d’éli s’escapèsse. De-segur quand i’avié trop de camin de faire, li bèsti èron menado la vèio de si prat à ‘no jasso qu’èro proche dis areno. D’aquéu biais i’avié mens à faire lou jour de la courso. Es de coumprene que se li biòu èron à courre de kiloumètre, poudien pas faire soun quart d’ouro de courso d’à founs dins lou round. De passa la nue dins uno jasso ié permetié de se repausa e prene quàuqui forço. L’endeman fasien lou pau de camin que restavo de faire e quand èron proche dis areno, li gardian s’abrivavon, dounc aceleravon pèr que li jouines atrapaire li foro-bandiguèsson pas dóu group. Un jour, arribè lou càrri qu’èro ‘no caisso de bos, uno meno de gàbi rouladisso tirassado pèr de chivau. À la debuto, i’avié ges de planchié. Emai li biòu se pousquèsson pas ‘scapa, ié falié courre. Aproufichant de l’evoulucioun di teinico de la carretarié, apoundeguèron un planchié e lou trasfèr se poudié faire lou meme jour que la courso, estènt que li biòu èron pas alassa. Lou càrri emé lou planchié avié de rodo lateralo independènto sènso eissiéu traversau, un tratour que tirassavo pièi lou càrri e li biòu, venguè necite estènt que la distanço aumentè d’à cha pau entre la manado e lis areno. Aquéu biais de faire permetié i biòu d’arriba is areno repausa e proun viéu. Li premié camioun, éli, arribèron tre 1907-1913. Pamens fauguè ‘spera lis annado 1930, i’a ges de dato mai preciso couneigudo, pèr vèire arriba li camioun Berliet, asata en bestiaiero pèr lou trasport di bèsti. Me ramente li prepaus de Pèire Aubanèu que me countè que li dous premié camioun Berliet qu’arribèron dins Gard, èron pèr sa manado. Lou jour de la courso, li biòu soun tria e recampa d’ouro dins sa manado e embarca dins lou camioun que ié dison toujour un càrri. Aqui lou manadié vo un gardian lis encoucardo, valènt-à-dire que pauso sus li bano de cado bèsti la coucardo, lis agland e li feicello. Lou camioun arribo pièi is areno mounte li biòu soun desbarca e plaça dins li caso dóu touril mounte van espera soun tour pèr rintra en pisto. Lou desbarcamen di bèsti es un moumen que lis afeciouna l’amon. De-segur emé la moudernita, i’a plus d’arribado is areno emé li biòu e li chivau. Dóu cop, pèr pas óublida li gèste d’autre-tèms, fasèn d’abrivado e la jouinesso, que ié dison de carbounié, emé d’esperfors assajon de faire s’escapa li biòu e acò venguè ‘no tradicioun. Antan, après la courso, i’avié la bandido dóu verbe bandi que vòu dire deliéura vo encaro, alarga li bèsti pèr soun retour i prat. Lou mot bandido, Frederi Mistral lou citè pas dins lou Tresor dóu Felibrige. Es un neoulougisme countempouran qu’espeliguè à la debuto dóu siècle vint. Dins noste relarg, i’a d’endré que lis apassiouna ourganison de lóunguis abriavado de peraqui dès kiloumètre de loungour o mai. S’agis de Vau-Verd, dóu Cailar, d’Eimargo e de Sant-Gile dins Gard. Fau pas óublida Lunèu, Sant-Brès dins Erau, Arle e lou Sambu dins li Bouco-dó-Rose. I’a dous vilo mounte lis abrivado recampon de milierado de mounde : li Sànti-Marìo-de-la-Mar et subre-que-tout lou Grau-dóu-Rèi emé l’Abrivado di Plajo. Vaqui en dous mot l’istòri. E aquéu jour d’aqui à Mandieul, la Manado Devaux rempourtè pèr la tresenco fes à-de-rèng la finalo dòu councours d’abrivado.

Pèr clava la sesiho, fau dire qu’encò nostre i’a ges de voto sènso biòu, acò noun eisisto. Anan acaba ‘mé lou jo de Qu’es acò ? Qu’es acò ? Escoutas bèn : « dous pougnènt, dous lusènt, quatre patantan e l’escoubeto au quiéu ». Avès devina ? Es lou biòu, evidentamen. Soulide.

Aro se fau dessepara. Vous doune rendès-vous la semano venènto. D’eici aqui, tenès-vous fièr e gaiard. Vous brassège amistousamen. Brave mounde, adissias.
Felip