LIS ERMAS PAR FELIP REIG SUR RADIO NÎMES - LOU TRESOR DE FREDERI MISTRAL 2

11 décembre 2024
Télécharger le podcast

Votre chronique en Occitan proposée par Felip Reig "Lis Ermas" sur Radio Nîmes. 

Rendez-vous sur le 92.2 ou sur radionimes.fr tous les mercredis à 6h00, 13h30, 19h00.

-------------------------------------------------------------------------------------

LOU TRESOR DE FREDERI MISTRAL 2

.............................................

Brave mounde, bèn lou bon-jour en tóuti… L’autre cop, s’erian interessa au diciounàri de Frederi Mistral, lou Tresor dóu Felibrige. Avèn vist de quent biais lou Mèstre avié alesti soun diciounàri que s’apielè sus lou dóu dóutour Simoun-Jude Honnorat. Avèn pièi parla de l’alestimen dóu Tresor pèr ço que pertoco la leissicougrafìo. Se fau ramenta que la leissicoulougìo que sa matèri es lou leissique, li mot, es uno sciènci, mentre que la leissoucougrafìo, l’avèn vist, es uno teinico. Encuei, anan regarda de mai proche lou leissicoulogue que i’avié encò de Frederi Mistral. Sabèn qu’uno part mage dóu leissique ié fuguè ispira pèr Honnorat. Bèn, pamens Mistral avié de courrespoundènt dins tóuti li relarg que n’en voulié apoundre lou parla dins lou Tresor. Malurousamen i’a ges de tiero, emai sachessian que Roumanille ié dounavo la man emé Achile Mir e Gastoun Paris. Franc d’aquéli tres, n’en sabèn pas mai. Sabèn tambèn que Mistral entre-prenguè de recerco pèr escriéure si pouèmo lou pouèmo dóu Rose, pèr l’asse Nord-Sud, e Calendau pèr l’asse Èst-Ouèst. Ço de reteni es que faguè un travai paralèle e en ié regachant de proche, se trobo que Calendau aguè un efèt estruturant dins lou Tresor. Verai, èro un besoun que Mistral avié de couleita lou voucabulàri necessàri pèr escriéure li siéu pouèmo e au cop e n’aproufichè pèr alimenta soun diciounàri. Fau prene en comte tambèn li sourso ouralo que Mistral n’en fasié la coulèito. Fau dire qu’èro mai utile de descurbi de champ leissicau nouvelàri pèr raport à-n-aquéli que fasien tra à la vido vidanto ruralo de Maiano. En seguido, falié metre lou fru d’aquéli recerco au service dóu diciounàri. Part acò, Leoun Teissier diguè dins soun analiso de Calendau que Mistral e Aubanel èron souvènti-fes de sejour encò de Ludouvi Legré à Cassis entre 1862 e 1864. Fasié ansin dos causo d’un soulet cop. Quand n’èro à la letro -C du diciounàri èro dins lou meme tèms à ‘caba d’escriéure lou cant vuechen de Calendau. Pamens d’un autre las, dire que Frederi Mistral entre-tenguè lou meme ritme pendènt tout aquelo pountannado d’aquéu travai en double sarié passa rego, d’abord que sabèn que couneissié quàuqui moumen ounte i’agradavo la coutemplacioun, tant sarié meme lou làngui, l’abatemen, subre-que-tout en 1860. Lou diguè en Anfos Dumas dins sa letro à Pasco de 1860 : « Fau quàuqui vers, pas forço… Fau pau, bèn pau. Me sèmblo que siéu à senti toujour mai l’infinido bèuta de la nature, es à dire de l’epoupèio de Diéu, e vène toujour mai coutemplatour ». I’aguè d’àutri letro de la memo meno. Dich acò, lou regreta Jan Boutiere nous diguè que la debuto vertadiero dóu travai de Mistral coumencè en 1853. Lou 21 de janvié d’aquelo annado, sié sièis mes après qu’Honnorat se mouriguè, Mistral escriéu à Roumanille : « … diras à moussu Seguin que ié croumpe lou Diciounàri d’Honnorat. Acò’s pas ‘no farço ». Perseguiguè en disènt qu’èro pèr faire un Supplemènt pèr Honnorat, e pèr acò faire apoundeguè dins soun dire à Roumaniho : « Óublidarés pas de faire apoundre uno man de papié blanc, es à dire vint-e-quatre fueio à la fin dóu darrié voulume ». Aquéu suplemènt fuguè ‘caba au mes de jun 1854, pamens, lou biais qu’aquéli fueio fuguèron rensignado fai la provo que i’aguè ges de roumpeduro entre lou suplemènt d’Honnorat et lou Tresor. N’en dirèn pas mai, pamens sian capable de n’en faire la demoustracioun. Pèr ço que pertoco la leissicoulougìo, Mistral, enfant privilegia di Muso èro escriptour e loucutour dins sa lengo.Se poudié pas manca estènt que n’èro tambèn lou fabre, coume Dante Alighieri lou fuguè pèr la lengo de si, lou Touscan. Alor se i’a un noum que lou fau pas óublida dins aquelo aventuro, es lou d’Antòni-Blàsi Crouzillat que nasquè en 1814 (1814-1819) que Mistral virè soun cap devers lou salounen. Lou 21 de desèmbre 1850, escriguè à Roumaniho pèr ié dire : « L’Ourtougràfi de Crouzillat es mai lougico que la nostro ». O encaro : « Ah ! quènti regrèt ! quèntis amar regrèt, e pèr vous e pèr iéu ! Aro que lou bandèu a toumba, se sabiés quant nosto ourtougràfi me sèmblo ridiculo. Sarias espanta ». E poudrian n’apoudre d’autro coume aquelo. Segur, i’aguè de critico que venguèro de Walther von Wartburg e d’Eirich Keller. Pamens èron de mounde saberu qu’èro nourmau pèr éli de trouba quàuqui defaut. Fau dire quand meme que despièi toujour e encaro vuei, lou Tresor dóu Felibrige es pres coume uno referènci. Leva d’acò, lou Tresor recebè ‘no acuiènço calourènto e avans la fin dóu siècle XIXen, se n’en troubè plus. I’aguè ges
de reedicioun dóu vivènt de Mistral e fauguè espera 1932, la dousenco edicioun encò d’Édisud. En fin finalo un pres-fa couloussau fuguè coumpli que lou Coumitat Nobel s’enganè pas en baiant à Frederi Mistral un prémi pèr soun obro literàri, es segur, mai tambèn pèr soun travai de filoulogue, de leissicougrafe e de leissicoulogue. Soulide.
Vaqui, aro la crounico es acabado, dise mi gramaci calourènt à Michèu Bouisson e Reinié Moucadel e dich acò, vous doune rendès-vous la semano venènto. D’eici aqui, avanças d’un pas lèri. Tenès-vous fièr e gaiard. Vous brassège amistousamen. Brave mounde adissias !


felip