26 septembre 2023
Votre chronique en Occitan proposée par Felip Reig "Lis Ermas" sur Radio Nîmes.
Rendez-vous sur le 92.2 ou sur radionimes.fr tous les mercredis à 6h00, 13h30, 19h00.
-------------------------------------------------------------------------------------
PASSEJADO ÀVILO-NOVO D’AVIGNOUN
Mi cars ami, bèn lou bon-jour en tóuti e siegues li bèn-vengu dins la crounico Lis Ermas emé lou felip e uno voues un brigoun cavernouso. Lou dimenche 23 d’abriéu 2023, l’Escolo felibrenco de Tradicioun de Bèu-Caire avié ourganisa uno passejado à Vilo-Novo d’Avignoun, la vilo dóu Felibre que degun pòu óublida, voulèn parla de Francés Pouzol que leissè sa vido sur lou camp bataié mounte mouriguè lou 28 de setèmbre 1918, quàuqui semano avans la fin de la guerro. Se sian reculi un moumenet davans soun oustau. La toco de l’escourregudo èro de vesita, premié lou fort Sant-Andriéu e dins lou tantost, la Chartrouso de Vilo-Novo d’Avignoun que belèu un jour n’en faren la presentacioun. Se parlo dóu fort e de l’abadié. La diferènci entre li dous es que dins lou fort, ajacènt à l’abadié i’a un vilage ancian. Dounc, l’istòri de l’abadié de Vilo-Novo coumenço emé la d’un ermitan particulié coume l’anan vèire. D’efèt, dins la Prouvènço dóu siècle VIen, d’ermitan se vènon metre à la sousto dins lis autour pèr fin de se poudé counsacra à la meditacioun. Uno femo que ié disien Casarìo se recato dins uno baumo dóu Mount-Andaoun, mounte uno iscripcioun afiermo que ié mouriguè lou 8 de desèmbre de l’an 586. Aquel epitàfi nous dis que Casarìo es estado fisado i suen d’un ome que ié disien Valens, au titre d’espous e de legat, pèr èstre inumado. Acò vòu dire que Casarìo èro maridado à ‘n di premiés evesque d’Avignoun e qu’aquéu, quand tournè à sa founcioun d’evesque, après agué gousta i joio dóu maridage, meteguè soun espouso dins un couvènt. D’aquéu tèms, acò se fasié. Après sa mort, un culto nais autour de Casarìo e la legèndo ié douno uno óurigino reialo - sarié estado la fiho d’un soubeiran vesigot d’Aragoun – e soun toumbèu vèn lèu un liò de roumavage. Pèr aculi li roumiéu, uno capello, la capello Sant-Andriéu, es aubourado au siècle Xen e ‘no autro au siècle seguen, la capello Sant-Martin. Tre lou siècle XIen, Casarìo es enaussado au rèng de santo e lou brès de la ciéuta de Vilo-Novo es l’abadié beneditino Sant-Andriéu foundado au siècle Xen. En 1226, l’abat Bertrand de Clausonne de l’abadié Sant-Andriéu fa un pache emé lou rèi Louïs lou VIIIen, ço que ié permet de counteni li pretencioun de la vilo d’Avignoun que la ribo drecho de Rose l’interessavo, subre-tout, lou proumountòri, es à dire lou baus de 68 mètre d’autitudo em’un visto que permet de vèire lou Ventour, lou Luberoun e lis Aupiho. En 1292, lou pache es pièi renouvela pèr Felipe le Bel. Se fau rapela qu’après lou trata de Paris en 1229, lou Lengadò vèn uno terro reialo. En mai d’acò fau marca que la papauta se vèn establi en Avignoun en 1309, jusqu’en 1378 e que souvènti-fes li papo se vènon pausa à Vilo-Novo.
Vaqui l’istòri de la neissènço de la viloto gardeso de Vilo-Novo d’Avignoun. Adounc, avèn fa la vesito dóu fort e de l’abadié mounte i’avié vuetanto mounge qu’à la fin n’i’avié plus qu’uno vinteno. Au siècle XVIIen, en 1637 eisatamen, uno coungregacioun de mounge mauristo arribo e entre-pren un prougramo ambicious de coustrucioun que se debano pendènt un siècle de tèms. Li mounge de Sant-Maur es uno coungregacioun de mounge beneditin qu’es estado creado en 1618. À la Revoulucioun, l’abadié es vendudo – en 1798 – à’n ome qu’avié noum Pèire-Ignaço Guiraud qu’entre-pren la demoulicioun dóu liò e la vèndo di materiau. En 1839, es Marial Fayau que croumpo l’abadié. Seguiguèron la coungregacioun di Sorre vitimo dóu Cor de Jèsu e en 1912 fuguè lou pintre celèbre Louïs-Jóusè Yperman (1856-1913) que ié venguè. Mouriguè en 1913 e en 1915, Elsa Koeberlé, pouëtesso, fai de l’abadié soun liò d’eisistènci enjusquo à sa mort en 1950. Elsa e soun amigo Genia Lioubow que nasquè souto lou noum d’Eugenìo Mazelin, – un noum russe èro miéus d’aquéu tèms –. Lou sarié mens à l’ouro d’aro. Basto, li dos femo óutènon l’ajudo de Gustave Fayet, un ome riche que recampo lis obro de Van Gogh e que baio à-n-Elsa lou dequé pèr croumpa l’abadié. À sa mort, Elsa Koeberlé fai doun de l’abadié à ‘no feleno de Fayet en signe de gramaci pèr sou ajudo passado. Aquelo feleno avié noum Rouselino Bacou que counsacro sa vido touto pèr restaura l’abadié. Rouselino Bacou mor en 2013 e lègo l’abadié à si nebout, descendènt de Gustave Fayet. Poudèn agué uno idèio dóu raiounamen espirituau de l’abadié de Sant-Andriéu de Vilo-Novo quand se saup que mai de dous cènt prieurat dependien de l’abadié de Sant-Andriéu. De-segur que n’i’a encaro de dire sus aquéu rode ras-qu’agradiéu. Soulide.
Aro la crounico es acabado e se fau dessepara. Vous doune rendès-vous la semano venènto. D’eici aqui, basto que lou tèms fuguèsse doucinèu. Vous brassège amistadousamen. Brave mounde, adessias !
felip
